Komunidade simu vasina kontra COVID-19 iha Sentru Saúde Comoro, segunda (30/08/21). Imajen Tatoli/António Gonçalves.

DILI, 01 setembru 2021 (TATOLI)—Durante implementasaun konfinamentu domisiliáriu jerál   iha Dili, partisipasaun populasaun ba programa vasinasaun kontra COVID-19 iha munisípiu ne’e menus.

“Ha’u haree rasik progresu atinjimentu partisipasaun ba vasina menus, no ida-ne’e impaktu boot  ba  atividade vasinasaun maske  pesoál saúde-sira la deskansa,” Diretora Serbisu Saúde Munisípiu Dili, Agostinha Segurado, hateten ba jornalista iha kna’ar fatin, kuarta ne’e.

Notísia relevante:COVID-19, óbitu lima no ativu 4.480

Agostinha Segurado esplika, ekipa saúde esforsu makas atu bele hasa’e taxa imunizasaun kontra COVID-19, iha munisípiu Dili liu hosi halo destakamentu pesoál saúde ba pontu entrada-sira  no mós halo sosiliazasaun hamutuk  ho ekipa Task Force munisípiu Dili, maibé konfinamentu ne’e lori impaktu  ba ekipa tanba partisipasaun komunidade mai iha postu vasina menus tebes.

Tuir dadus, durante seidauk implementa konfinamentu domisiliáriu jerál, atinjimentu ba vasina iha  ema ne’ebé mai vasina kada loron hahú hosi rihun tolu too rihun neen, maibé durante konfinamentu domisiliáriu jerál, númeru partisipasaun tun to’o loron ida ema na’in 600-resin.

Tanba ne’e, estratejia hosi pesoál saúde sira durante konfinamentu maka, tenke la’o to’o iha aldeia sira lori karreta hodi aviza maibé laiha ema ida mak hakarak atu mai fatin vasinansaun.

Maski nune’e, parte Serbisu Saúde munisípiu Dili buka nafatin mekanizmu ne’ebé diak liu atu bele hasa’e taxa partisipasaun vasina iha Dili.

To’o ohin, totál doze vasina ne’ebé fó ona ba populasaun elijível tinan 18 ba leten, to’o ohin dader 10:00,  tuir sistema informasaun Saúde iha Ministériu Saúde  ho totál  kumulativu 1ª doze iha Dili (74,1%) no totál  kumulativu 2ª doze  iha Dili (57,4%).

Ema ne’ebé simu ona vasina doze dahuluk iha Timor Leste  (51,6%) no simu ona doze daruak  (26,1%).

Governu liu hosi Konsellu Ministru prodús ona projetu rezolusaun Governu iha kuarta 25 agostu, ne’ebé deside aplika hikas konfinamentu domisiliáriu jerál ba populasaun iha Dili, entre tuku 00:00 loron 27 agostu to’o tuku 23:59 loron 02 setembru 2021.

Hosi projetu rezolusaun ne’e sita katak, iha área hotu-hotu munisípiu Dili-nian bandu transporte públiku, liuliu táxi, mikrolete no anguna atu halo sirkulasaun.

Alende ne’e, suspende selebrasaun relijioza koletiva no bandu mós atu halo serimónia fúnebre, ne’ebé envolve partisipasaun ema na’in-sanulu liu no sira ne’ebé partisipa serimónia ne’e rasik tenke uza máskara oin, hodi taka inus no ibun inklui mantein distánsia pelumenus metru ida ho ema seluk ne’ebé prezente iha serimónia ne’e.

Estabelesimentu komersiál, industriál, artezanál ka prestasaun servisu taka ba públiku, ho exesaun ba estabelesimentu-sira ne’ebé autoriza iha Rezolusaun Governu, liuliu estabelesimentu ne’ebé fa’an ai-han no sasán nesesidade bázika, eletrisidade, telekomunikasaun, prestasaun kuidadu médiku, farmásia, postu kombustível-nian, no instituisaun finanseira-sira.

Restaurante-sira bele fornese hahán, aplika rejime take away ka entrega iha uma de’it no estabelesimentu seluk  taka ba públiku bele dezenvolve ninia atividade liuhosi serbisu entrega ba uma de’it.

Vendedór ambulante ba sasán alimentár no sasán ba nesesidade bázika bele mantein sira-nia atividade, no merkadu Manleuana ho Taibessi bele mantein funsionamentu, hahú hosi tuku 06:00 to’o tuku 18:00 otl.

Pesoál saúde iha Dili na’in 50 pozitivu COVID-19

Oras-ne’e daudaun Serbisu Saúde Munisípiu Dili, rejista pesoál saúde hamutuk na’in 50 mak infetadu COVID-19.

Maski nune’e, parte serbisu saúde kontinua atividade hotu-hotu hanesan baibain tanba pesoál saúde sufisiente hela.

“Munisípiu Dili iha rekuru sufisiente atu garante hodi loke  nafatin serbisu esensiál  liuliu iha maternidade, emerjénsia no ambulatóriu,” Agostinha Segrado, hateten.

Pesoál saúde na’in 50 ne’e mai hosi postu administrativu Vera Cruz  hanesan  sentru saúde Formoza II hamutuk ema na’in 16, sentu saúde Comoro iha ema na’in 16, sentru saúde  Becora na’in -neen,   sentru saúde Ataúro na’in sanulu no  sentru saúde Metinaro na’in-rua.

Númeru ne’e kompostu hosi médiku, parteira, enfermeiru no mós tékniku aliadu-sira ne’ebé kompleta ona sira-nia vasina konta COVID-19.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here