Prezidente Autoridade Munisípiu Baucau, Olívio 'Bou-Lesa' Freitas. Imajen TATOLI/Natalino Belo

BAUCAU, 01 setembru 2021 (TATOLI)—Prezidente Autoridade Munisípiu (PAM) Baucau, Olívio ‘Bou-Lesa’ Freitas, enkoraja komunidade Baucau atu partisipa másimu iha kampaña vasinasaun, nune’e hamenus risku kontájiu COVID-19.

“Husu ba komunidade Baucau tenki vasina atubele hadook-an hosi COVID-19 no ita sei deklara katak Baucau livre ona,” PAM Baucau hateten iha edifísiu edukasaun munisipál, Villa nova, kuarta ne’e.

Autoridade munisipál ne’e konsidera, vasina hanesan lutu ba ema nia isin hodi satan COVID-19, maski tuir esperiénsia vasina kompleta mós la garante atu la infetadu vírus, maibé sei la fó risku boot ba ema tanba imunidade pesoál aumenta.

“Baucau livre hosi COVID-19 bainhira komunidade kontribui partisipa másimu iha kampaña vasinasaun. Tuir Governu nia alvu ne’ebé fó mai ita hamutuk 71.000, enkuantu agora ita atinje ona 60.000, bainhira povu hotu hamriik no fó an ba vasina iha fulan ne’e, ita sei atinje tuir alvu ne’e,” nia hatutan.

Bou lesa konsidera, tuir loloos bainhira impoin serka sanitária iha área Baucau, ema labele tama-sai rejiaun ne’e, maibé realidade ema hosi Dili no munisípiu seluk kontinua tama tanba razaun servisu no pesóal.

Notísia relevante: Serka sanitária iha Baucau-Covalima hahú aban to’o 08 setembru

“Ita Baucau aplika serka sanitária, signifika ita bele sirkula maibé tenki uza maskara, halo distánsia fízika no fase liman, la’ós hanesan konfinamentu domisiáriu obrigatoriu,” nia akresenta.

Maski nune’e, movimentu tama sai iha portaun entrada postu vijilánsia kontinua iha, maibé nafatin pasa revista ba kartaun vasinasaun atu konfirma, enkuantu ba hirak ne’ebé seidauk vasina tenki liuhosi swab.

Tuir dadus Ministériu Saúde, daudaun ne’e iha Baucau, totál vasina doze dahuluk hamutuk 50,7% no doze daruak hamutuk 19,4%.

Serka sanitária iha Baucau hahú iha loron 26 agostu no sei termina iha loron 08 setembru.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here