PAM Baucau, Olívio 'Bou-Lesa' Freitas. Imajen TATOLI/Natalino Belo

BAUCAU, 01 setembru 2021 (TATOLI)–Prezidente Autoridade Munisípiu (PAM) Baucau, Olívio ‘Bou-Lesa’ Freitas, husu ba Edukasaun munisipál atu rigór implementa projetu eskolár, nune’e bele finaliza ho sussesu.

“Edukasaun munisipál tenke ezerse servisu extra, oinsá bele fó projetu ba ema ne’ebé nia fiar tanba la’ós konkursu, liuliu asosiasaun eskola tenki haree ema no fó kontratu ba sira, tenki haree ema sira-ne’ebé iha antisidénsia hala’o ona projeitu no kontratadu ruma mak hala’o, atu nune’e bele konklui ho di’ak, se naran de’it maka nia rezultadu sei sabraut,” PAM Baucau hateten iha edifísiu edukasaun munisipál, kuarta ne’e.

Autoridade Baucau ne’e sente haksolok tanba hetan fiar hosi Ministériu Edukasaun Juventude no Desportu (MEJD) hodi implementa projetu eskolár 30 iha postu admistrativu Baguia, Laga, Quelicai, Venilale no Baucau villa.

Notísia relevante: Autoridade munisipál implementa projetu edukasaun 30 iha Baucau tinan ne’e

Obra ne’e sei implementa la’ós liuhosi empreza, maibé diretamente hosi komunidade, ho objetivu fó benefísiu direta ba komunidade, tanba ne’e molok implentasaun sei liuhosi faze formasaun.

Durante ne’e, maioria dirijente eskola sira iha Baucau sempre kestiona kona-ba fasilidade infraestrutura ne’ebé laiha kondisaun, nune’e liuhosi projetu bele responde aspirasaun sira.

“Depende de’it ba diretór eskola sira ne’ebé sai benefisiáriu, sira mak sei foti desizaun no responsabiliza,” nia akresenta.

Eskola ne’ebé sai benefísiariu ba implementasaun projetu mak Ensinu Sekundária Públika Filiál Baguia harii sala tolu inklui toilet no sala profesór, Eskola Bázika Filiál (EBF) Ossolia Quelicai harii sala tolu no toilet, EBF Darlai Laisoru-lai Quelicai harii sala tolu no toilet.

Ensinu sekundáriu númeru 01 Baucau villa harii sala tolu no Laboratóriu, Ensinu Báziku Sentrál (EBC, sigla portugés) Lawateri harii sala tolu no sala profesór, EBC Osso-huna reabilisa sala neen, EBF Uakalaharii sala tolu, Pre-eskolar amizade Venilale harii sala rua, toilet, sala kuziña no armazen.

Projetu ne’e tuir alvu sei hahú implementa iha fulan-novembru 2021 no sei termina iha fulan-abríl 2022.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here