Ministru Petróleu no Minerál, Víctor da Conceição Soares. Imajen TATOLI/Francisco Sony

DILI, 01 setembru 2021 (TATOLI)Ministériu Petróleu no Minerál (MPM) no Autoridade Nasionál Petróleu no Minerál (ANPM) liuhosi Komisaun Avaliasaun ba Impaktu Ambientál, halo ona analiza ba aspetu impaktu ambientál no sosiu-ekonómiku iha área projetu perfurasaun mina-matan iha munisípiu Manufahi.

Ministru Petróleu no Minerál, Víctor da Conceição Soares, hateten, tuir planu iha fulan-outubru empreza Timor Resoruces hahú halo perfurasaun mina-matan rua iha Suai hanesan área Matai bloku Karau no área suku Camasa bloku samfu tanba hetan ona lisensa ambientál.

“Maibé, bloku ida iha suku Foho-ailico, postu Hatu-udo no suku Betano, postu Same iha Manufahi iha atrazu oituan iha lisensa ambientál. Nune’e ami aselera ona, ne’ebé ekipa estudu ambientál komesa la’o ona. Ha’u hanoin tempu besik bele atribui ona lisensa ambientál ba Timor Resources,” Ministru Víctor hateten iha resintu Ministériu Finansa, Aitarak-laran, kuarta ne’e.

Notísia relevante: Governu atribui lisensa ambientál ba Timor Resources fura mina-matan

Governu hakarak aselera hasai lisensa ambientál ba empreza petrolífera australiana ne’e tanba ho intesaun atu fura bloku rua iha Suai no muda ekipamentu bá bloku iha Manufahi.

Nune’e, iha fulan-agostu, Komisaun Avaliasaun ba Impaktu Ambientál projetu perfurasaun petróleu iha área kontratu PSC TL-OT-17-09, realiza konsulta públika ba Deklarasaun Impaktu Ambientál (DIA) no Planu Jestaun Ambientál (PJA) iha suku Foho-ailico, postu Hatu-udo no suku Betano, postu Same.

Objetivu konsulta públika atu rona preokupasaun no opiniaun hosi komunidade afetada projetu no autoridade lokál, relasiona ho implementasaun projetu perfurasaun, liuliu iha aspetu impaktu ambientál no sosiu-ekonómiku.

Empreza Timor Resoruces iha parte ne’e, kontinua husu ba Governu Timor-Leste atu fó apoiu tratamentu espesiál hodi lori tékniku sira hosi Indónezia mai iha Timor-Leste.

“Ha’u fó ona tratamentu liuhosi prosedimentu ba Sala Situasaun, Sentru Integradu Jesatun Krize (CIGC, sigla portugés), Ministériu Negósiu Estranjeiru no Kooperasaun, no Ministériu Interiór atu fó autorizasaun hodi tékniku sira bele tama mai,” nia dehan.

Notísia relevante: Timor Resources husu Governu fó tratamentu espesiál lori tékniku internasionál

VIII Governu Konstitusionál, antes ne’e hakarak fó tratamentu espesiál iha situasaun pandemia, ba servisu iha setór petrolíferu iha tasi laran no rai maran hodi fó reseita ba Estadu.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here