Prezidente Konsellu veteranu. Vidal de Jesus "Riak Leman". Imajen Tatoli/Francisco Sony.

DILI, 01 setembru 2021 (TATOLI)—Prezidente Konsellu Veteranu, Vidal de Jesus ‘Riak Leman’, husu ba veteranu sira-ne’ebé atu verifika dokumentu ne’e labele falsifika dokumentu.

Notísia Relevante: Ekipa Nasionál halo verifikasaun ba dadus veteranu rejistadu iha 2009

“Iha ami-nia monitorizasaun ba verifikasaun dadus veteranu nian ne’e, ha’u husu atu labele falsifika dokumentu. Ko’alia loloos ba ekipa verifikasaun katak partipasaun luta ne’e tinan ida ne’e tenke dehan tinan ida, labele tau fali tinan lima, ne’e ladi’ak,” Prezidente Konsellu Veteranu ne’e hateten ba Agência TATOLI, liuhusi telefónika, kuarta ne’e.

Bainhira falsifika dokumentu mak ekipa verifikasaun identifika, entaun sei simu nia konsekuénsia hodi ba hatán iha Tribunál no sei tama ba kadeia, tanba ne’e iha monitorizasaun ne’e ekipa Konsellu Veteranu kontinua husu no avizu nafatin katak ko’alia ho loloos no momoos ba ekipa verifikasaun dadus ne’e.

“Ita halo monitorizasaun ne’e tanba iha tinan kotuk ne’e iha veteranu balun falsifika dokumentu hodi simu osan no balun dehan mate ai-laran, maibé realidade ne’ebé iha katak mate iha vila-laran. Tanba ne’e, atu di’akliu labele falsifika dokumentu ne’e,” nia informa.

Atu labele akontese tan ho kazu hanesan iha tinan kotuk, Prezidente Konsellu Veteranu ne’e hateten, tanba ida-ne’e mak komesa hosi Prezidente Repúblika mai to’o populasaun baibain tenke kumpre lei no regra ne’ebé vigora ihae Timor-Leste.

“Ha’u fiar katak ho ami-nia ekipa Konsellu Veteranu ne’ebé halo monitorizasaun ba verifikasaun dadus ne’e sei la akontese tan ho kazu ne’ebé hanesan no ba future,” nia dehan.

Prosesu investigasaun ba elementu veteranu ne’ebé falsifika dokumentu la’o hela iha inspetoria Asuntu Veteranu nian no balun tama ona kadeia.

Lista veteranu falsu ne’e deskonfia iha indísiu benefisiáriu sira halo falsifikasaun ba dokumentu hodi sai veteranu no martir hodi hetan pensaun hosi Estadu, no naran sira-ne’e ministériu simu keixa hosi veteranu no komunidade balun hahú hosi 2012 to’o mai agora.

Riak Leman dehan, iha lista naran 500-resin mak parte inspetór ministériu nian finaliza nia investigasaun hodi haruka ba Ministériu Públiku (MP) prosesa tuir lei ne’ebé vigora.

Hosi lista 3000-resin ne’ebé daudaun ne’e parte Ministériu Asuntu Kombatente Libertasaun Nasionál koopera ho Polísia Sientífika Investigasaun Kriminál ba prosesu investigasaun la’o hela bainhira finaliza bele kanaliza ba Ministériu P’ublika.

Mezmu hosi lista ne’ebé deskonfia iha falsifikasaun antes ne’e sira simu ona pensaun kada fulan hosi Estadu, maibé hafoin Ministériu Asuntu Kombatente Libertasaun Nasionál (MACLN) identifika hodi deside hapara pensaun.

“Ministériu hein ema hirak ne’e nia reklamasaun. Maibé iha situasaun ne’e to’o agora laiha ema ida mak mai halo reklamasaun,” Riak Leman hateten.

Notísia Relevante: MAKLN prepara ekipa re-verifika dadus veteranu rejistadu iha 2009

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here