DILI, 01 setembru 2021 (TATOLI)–Governu liuhosi Ministériu Saúde tenke tau atensaun sériu ba sala izolamentu sira iha territóriu nasionál nune’e garante ijiente no hahan ba ema sira-ne’ebé pozitivu COVID-19.
“Se ita hakarak lori povu rai ida-ne’e ba moris di’ak hanesan ita hotu-hotu nia mehi, favór ida tau netik atensaun ba ema sira-ne’ebé mak baixa iha sala izolamentu, ba sira-nia hahan, ba sira-nia estadia iha laran durante ne’e,” Deputada Bankada Congresso Nacional de Reconstrução de Timorense, Veneranda Lemos, ko’alia iha uma fukun, kuarta ne’e.
Governu aplika beibeik estadu emerjénsia atu besik tinan-rua ona hodi introdús tán medida serka sanitária no konfinamentu obrigatóriu maibé númeru pozitivu COVID-19 iha Timor-Leste sa’e ba beibeik ne’e ninia fukun mak saida.
“Problema ne’e iha-ne’ebé, sulan povu maibé númeru moras ne’e sa’e ba beibeik. Ne’e buat ruma laloos. Se ita hotu preokupadu ho situasaun ida hanesan ne’e, tenke iha esklaresimentu ruma hodi hateten ba públiku saida mak laloos,” nia kestiona.
Deputada Bankada CNRT lamenta tanba deklarasaun estadu emerjénsia bada-17 ona, no ema-ne’ebé mate ho COVID-19 ne’e barak ona maibé Governu la halo polítika hodi prevene, nune’e ema labele mate tán.
Jornalista : Evaristo Soares Martins
Editór : Cancio Ximenes
