Reuniaun Konsellu Ministru iha auditorium Ministériu Finansa, Aitarak-laran, kuarta (01/09). Imajen TATOLI/Francisco Sony

DILI, 01 setembru 2021 (TATOLI)Governu liuhosi reuniaun Konsellu Ministru (KM) aprova ona Projetu Dekretu-Lei ba alterasaun dahuluk Dekretu-Lei númeru 18/2012, loron 04 abríl, ne’ebé kria subsídiu ba inan isin-rua no ba labarik sira, designadu nu’udar Bolsa da Mãe.

Proposta ne’e aprezenta hosi Vise Ministra Solidariedade Sosiál no Inkluzaun (MSSI), Signi Chandrawati Verdiál.

“Diploma ne’e atu reforma programa Bolsa da Mãe, ho hanoin atu garante inisiativa ne’e bele jere impaktu signifikativu ida hodi hamenus ki’ak no ba promosaun kapitál umanu nasionál. Nune’e, Bolsa da Mãe hahú integra prestasaun adisionál rua ho objetivu fó apoiu sosiál ba inan isin-rua no ba primeira infánsia (labarik menus tinan-neen), hodi hadi’a saúde no nutrisaun materna no infantil atu promove inkluzaun ekonómika no atu fomenta ekonomia lokál,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha auditorium Ministériu Finansa, Aitarak-laran, kuarta ne’e.

Nune’e, programa sei implementa ho forma fazeada ka progresiva hodi asegura hanesan prioritária atuasaun iha área jeográfika ho indíse ki’ak no má nutrisaun, inklui protesaun ba inan isin-rua no primeira infánsia.

Programa sei expande ba territóriu nasionál tomak ba períodu implementasaun tinan-lima, hahú iha tinan 2022, ba munisípiu Ainaro no Bobonaro inklui Rejiaun Administrativa Espesiál Oé-cusse Ambeno (RAEOA).

Enkuantu, iha tinan 2023, Bolsa da Mãe – jerasaun foun sei expande ba munisípiu Covalima, Liquiçá, Manatuto, no Viqueque.

Enkuantu, munisípiu Ermera, Baucau, Aileu no Lautém sei inklui iha programa tinan 2024 no ikus liu Bolsa da Mãe sei abranje iha munisípiu Dili iha tinan 2025.

Programa  Bolsa da Mãe hahú implementa iha tinan 2008 ho pilotu iha munisípiu balun de’it, maibé iha 2012 hahú implementa munisípiu hotu inklui RAEOA.

Tuir dadus hosi MSSI benefisiáriu programa ne’e hamutuk 180.595, kompostu hosi uma-kain  46.272 no labarik 134.323.

Iha Munisípiu Aileu benefisiáriu ba Bolsa da Mãe hamutuk 2.524, Ainaro 3.337, Baucau 4.743, Bobonaro 3.679, Covalima 3.937, Dili 4.984, Ermera 3.211, Lautém 3.044, Liquiçá 3.228, Manatuto 2.346, Manufahi 2.979, RAEOA 4.301 no Viqueque 2.789.

Subsídiu ne’ebé atribui iha kategoria rua, simu $25 no kiik liu $5 kada fulan.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here