Ministru Administrasaun Estatál, Miguel Pereira de Carvalho. Imajen TATOLI/Francisco Sony

DILI, 01 setembru 2021 (TATOLI)-Governu liuhosi Ministériu Administrasaun Estatál (MAE) hakarak promove espirítu voluntarizmu komunidade liuhosi Programa Movimentu Hafoun (Rejenerasaun) Aldeia (PMOHA) atu hametin relasaun administrasaun Estadu ho administrasaun lokál.

Tanba ne’e, Ministru Administrasaun Estatál, Miguel Pereira de Carvalho, aprezenta alterasaun Projetu Dekretu-Lei, ne’ebé define rejime jerál PMOHA, iha reuniaun Konsellu Ministru (KM).

“Ita-nia vizaun ba programa ne’e sei implementa iha aldeia pilotu sira atu promove espíritu voluntarizmu komunidade iha nível aldeia no hametin relasaun administrasaun Estadu ho lokál inklui partisipa atividade sosiu-ekonómiku oin-oin liuhosi subsídiu ba kada aldeia pilotu sira,” Ministru Miguel hateten iha resintu Ministériu Finansa, Aitarak-laran, kuarta ne’e.

Notísia relevante: Governu define rejime jerál programa Movimentu Hafoun

Nune’e, KM aprova ona alterasaun ne’e hodi  define rejime jerál no estabelese ninia prinsípiu orientadór no kondisaun ba ezekusaun.

Tuir governante, Governu sei submete ba Prezidente Repúblika, Francisco Guterres ‘Lú olo’ atu analiza dokumentu sira hafoin promulga.

“Ha’u labele ko’alia barak tanba sei iha faze aprovasaun hosi Governu, ne’ebé aban bainrua karik públika ona, Governu halo planu atu aloka orsamentu intensiva ba aldeia pilotu sira atu komunidade sira bele uza orsamentu hodi partisipa atividade sosiu-ekonómiku,” nia akresenta.

Iha tinan 2016, Saemaul Undong husi Repúblika Koreia no Governu Timor-Leste asina akordu, tuir saida maka implementa ona iha programa esperimentál iha aldeia haat iha munisípiu Lautém, iha tinan 2016 to’o 2020.

Nune’e, ho diploma ne’e kria rejime jurídiku hodi fundamenta implementasaun programa iha nível nasionál.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here