Diretór Edukasaun RAEOA, Daniel Mauno. Imajen Tatoli/Abilio Elo Nini.

OÉ-CUSSE, 01 setembru 2021 (TATOLI)—Edukasaun Rejiaun Administrativa Espesiál Oé-Cusse Ambeno (RAEOA), kontinua suspende aula prezensiál hahú loron 01-12 setembro ba eskola privado no públiku sira iha RAEOA atu prevensaun COVID-19.

Diretór Edukasaun RAEOA, Daniel Mauno, hateten bazea ba despaisu hosi Ministériu Edukasaun Juventude no Desportu (MEJD) númeru 45/GMEJD/VIII/2021, kona-ba progresaun suspensaun provizóriu ba prosesu ensinu aprendizajen prezensiál, estabelese ba munispiu Dili, Ermera no RAEOA, hahú iha tuku 00:00 loron 31 augostu to’o tuku 23:59 loron 13 setembru 2021

“Despaixu suspensaun ne’e mai to’o Oé-Cusse iha 31 agostu hosi MEJD mak asina, aplika ba munispiu tolu, Dili, Ermera ho Oé-Cusse atu kontinua suspende atividade aula prezensiál to’o 12 setembru 2021. Tanba haree hosi númeru kazu COVID-19 aas, entaun ministériu edukasaun hasai karta despaixsu ne’e to’o semana-rua mak ita haree nia progresaun ne’e oinsa,” Daniel Mauno hateten ba Agência Tatoli iha Santa Rosa, Oé-Cusse, kuarta ne’e

Suspensaun ba dahuluk ne’e to’o de’it fulan agostu nia rohan, entaun iha setembru ne’e kontinua suspende-tán semana-rua to’o 12 setembru. Bainhira progresaun númeru kazu menus, posibilidade ministériu sei deklara atu reativa hikas tanba preparasaun ba ezame nasionál mós besik ona.

Nu’udár dirijente Edukasaun RAEOA, nia apela ba kandidatu atu partisipa ba ezame nasionál iha tinan 2021, tantu Ensinu Báziku no Ensino Secundário sira, husu atu uza oportnidade durante feriado ne’e atu estuda ba preparasaun.

Nia garante katak tanba nu’udár kandidatu ba ezame nasionál iha vontade nafatin atu buka meiu ba rekolla matéria sira atu hahú prepara-aan, bainhira Governu autoriza atuu hahú falin aula prezensiál, pelumenus iha ona preparasaun.

Jornalista: Abílio Elo Nini

 

Editór: Cancio Ximenes

HAKEREK NO HATÁN

Please enter your comment!
Please enter your name here