Ekipa saneamentu rekolla hela lixu iha Kapitál Dili. Imajen Tatoli/Antonio Gonçalves.

DILI, 01 setembru 2021 (TATOLI)-Xefe Departamentu Saneamentu Munisípiu Dili, Domingos Soriano, informa pesoál servisu Saneamentu Munisípiu Dili  na’in-30 resin labele servisu ho efetivu hodi hamoos lixu sira iha Dili laran tanba Governu aplika konfinamentu obrigatóriu jerál (lockdown).

“Ita-nia funsionáriu Saneamentu Munisípiu Dili nian hamutuk nain-218 ne’ebé konfinamentu obrigatóriu to’o mai loron ohin, totál funsionáriu saneamentu ne’ebé la tama servisu hamutuk 30-resin razaun tanba pesoál saúde sira ne’e maioria hela dook hosi Dili, no laiha transporte privadu, entaun transporte públiku la halai sira mós servisu labele ativu,” Domingos Soriano hateten ba Agência Tatoli iha nia knaar fatin Mataduro, Dili, kuarta ne’e.

Nia afirma, funsionáriu sira ne’ebé hela dook hosi Dili mak hanesan, hela Hera no Tibar, entaun transporte públiku la  halo operasaun sira mós laiha transporte privadu entaun sira tama servisu ladún ativu hanesan loron ida tama no loron ida la tama maibé atividade kona-ba limpeza ka ra’ut fo’er iha kapitál Dili kontinua la’o tanba karreta ne’ebé Governu fó kontratu atu transporta lixu kontinua la’o.

“Ita ko’alia kona-ba servisu saneamentu nian ne’e laiha feriadu dezde COVID-19 tama iha Timor-Leste ba limpeza sidade to’o agora servisu kontinua la’o, maske funsionáriu balu serbisu ladún ativu maibé ida ne’e la’ós kestaun ba ita ne’ebé servisu ita kontinua la’o,” nia dehan.

Ba funsionáriu sira ne’ebé iha tempu konfinamentu obrigatóriu nia-laran mak tama servisu ladún ativu nia parte fó toleránsia, maibé servisu normal mak funsionáriu sira la tama ne’e konsidera falta no ko’a osan.

Karreta ne’ebé durante ne’e halo operasaun ra’ut fo’er iha kapitál Dili hamutuk 49, mak fahe fali ba Postu Administrativu sira hanesan, Don Aleixo karreta hamutuk 23 ne’ebé kompañia Loris ho karreta 11 no kompañia Felibra ho karreta 12 maka responsabiliza foti fo’er sira lori ba soe iha Tibar.

Vera Crus karreta sia (9) hosi kompañia Jagrilo, Nain-Feto, karreta sanulu kompañia Labelay mak kaer, Cristo Rei karreta hitu hosi kompañia Abolala.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here