Ekipa Tékniku MAPKOMS rekolla dadus komunidade ne’ebé iha televizaun iha Aldeia Clac Fuic, Becora, Cristo Rei, Dili. Imajen Tatoli/Nelia Fernandes.

DILI01 setembru 2021 (TATOLI)—Atu muda sistema Rádiu no Televizaun Timor-Leste hosi analog ba dijitál, kuarta ne’e Ekipa Tékniku hosi Ministériu Asuntu Parlamentár no Komunikasaun Sosiál rekolla dadus no sei distribui receiver no antena gratuita ba komunidade ne’ebé iha televizaun, iha Aldeia Clac Fuic, Becora, Cristo-Rei, Dili. 

Asesor ba Asuntu Planu, Programa no Relasaun ba Forsa Traballu hosi Ministériu Asuntu Parlamentar no Komunikasaun Sosiál (MAPKOMS), Graciano Pires dos Santos, informa atividade ne’e hala’o ho objetivu atu distribui receiver no antena gratuita, no halo instalasaun ba komunidade kada uma kain atu bele asesu informasaun.

“Ida-ne’e parte ida hosi programa Governu nian hakarak diversifika meiu komunikasaun sosiál. Entaun, ida-ne’e parte ida hodi bele muda RTTL ninia sistema analog ba iha dijitál, ita hahú daudaun ho programa sira-ne’ebé apoiu hosi Governu Xina, nune’e la’o hamutuk hodi realiza programa ne’e,” Graciano Pires dos Santos hateten ba Agência Tatoli, via telefónika, kuarta ne’e.

Bainhira dadus halibur hotu ona no halo rejistu, ekipa sei distribui sasán hirak ne’e tanba daudaun ne’e sasán sira-ne’e prontu hotu ona.

“Ita hein to’ok semana ida-ne’e nia laran, kuandu la kontinua konfinamentu obrigatóriu, ha’u hanoin ita bele tama ona faze distribuisaun no instalasaun,” nia dehan.

Xele Aldeia Clac Fuic, Suco Becora, Postu Administrativu Cristo Rei, Munisípiu Díli, Almerindo A. Fatima Teodozo, hateten daudaun ne’e ekipa foti levantamentu dadus hosi Ministériu Asuntu Parlamentár no Komunikasaun Sosiál (MAPKOMS), mai foti dadus ba uma kain ba komunidade ne’ebé hela iha suku Becora, prinsipál Aldeia Clac Fuic nian, ba sira-ne’ebé iha televizaun iha uma.

“Aldeia hotu-hotu ne’ebé iha suku Becora tomak ne’e, ba liu komunidade ne’ebé iha televizaun hanesan rejistu naran, nomor kartaun eleitorál no númeru telefone, atu nune’e kada uma kain ida, atu simu receiver ho antene gratuita hosi MAPKOMS, ho nune’e ita bele asesu ba notisia nasionál no internasionál hotu hosi RTTL,” nia dehan.

Programa ida ne’e, ba komunidade hotu, hanesan komunidade ne’ebé servisu, no la servisu, hotu-hotu rejistu, entaun iha aldeia Clac Fuic daudaun ne’e kuaze uma kain 190 ne’e mak agora rejistu ona.

“Agora, ami sei la’o nafatin. Balun ne’ebé seida’uk rejistu ami sei tama nafatin. Ba ida-ne’e orsida rejistu tiha, sira sei simu nota mean ida no Xefe Aldeia iho nota kinur, hodi aban bainrua distribui ona mai iha suku, sira lori de’it nota ne’e ba Xefe Aldeia halo vistu. Nune’e, ekipa tékniku sei tun direita ba uma ne’ebé mak iha televizaun, hanesan ami lori receiver ba sira rasik mak monta. Ba sira ne’ebé televizaun aat ne’e la simu. Ba sira-ne’ebé televizaun di’ak, ekipa monta direta. Receiver no antena ne’e sei hetan chanel 22 iha mundu,” nia dehan.

Hosi totál uma kain iha aldeia Clac Fuic hamutuk 397 ne’e, ekipa MAPKOMS rejistu ona uma kain hamutuk 190 no sei falta uma kain 207 mak seidauk foti dadus.

Reprezentante komunidade Aldeia Clac Fuic, Marcelino de Carvalho, sente kontente ba programa hosi MAPKOMS ne’ebé sei oferese antena no receiver gratuita ba komunidade ne’ebé iha televizaun.

“Ami sente kontente ba programa hosi Governu nian ne’e tanbá fó gratuita ba ami hodi ami bele akompaña informasaun liuhosi notísia iha railaran no rai-li’ur liuhosi sistema dijitál. Ami agradese ba Governu no ami simu ho liman rua,” nia dehan.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here