Portaun boot atu tama ba áera Munisípiu Viqueque. Imajen Tatoli/Vitorino Lopes da Costa.

VIQUEQUE, 31 agostu 2021 (TATOLI)—Serbisu Saúde Munisípiu Viqueque, haloot ema ida ho idade 63, ne’ebé hakotu-i’is ho COVID-19 iha izolamentu Polo UNTL, iha tuku 18:35 otl.

Diretór Serbisu Saúde Munisípiu Viqueque, Francisco de Carvalho, informa, pasiente ne’e tama izolamentu iha 19 agostu, hosi postu administrativu Ossu, no  ohin parte saúde no família ba haloot ona iha semitériu Bua-nurak.

Notísia relevante:COVID-19, óbitu tolu no kazu ativu 4.499

“Pasiénte dada-i’is mós la di’ak no  ita hala’o tratamentu hodi tau oksijéniu. Ohin, ekipa saúde hamutuk ho família haloot tuir portokolu saúde,” Francisco de Carvalho, hateten iha edifísiu serbisu saúde, Boromatan, munisípiu Viqueque, tersa ne’e.

Antes ne’e, matebian sofre moras tuberkuloze, respiratóriu aguda no ikus-mai matebian sofre tan COVID-19.

Bainhira matebian tama izolamentu, parte serbisu saúde kontaktu ba nasionál hodi transfere ba Vera Crus, maibé família-sira rejeita tanba ne’e, la halo konsege hala’o transferénsia.

Matebian mós seidauk simu vasina, nune’e apela ba populasaun iha munisípiu Viqueque atu simu vasina hodi proteje an hosi moras ne’e.

Tuir dadus, pasiente pozitivu COVID-19 iha izolamentu polo UNTL munisípiu Viqueque hamutuk na’in 89.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here