Ekipa voluntáriu sira dezinfeta repartisaun Estadu nian iha Munisípiu Manufahi, tersa (31/08/2021). Imajen/Espesiál

DILI, 31 agostu 2021 (TATOLI)-Administradór Munisípiu Manufahi, Arantes Isaac Sarmento, hamutuk ho ekipa voluntáriu hosi grupu juventude Nularan Bersaudara (NUBER’S), Unidus iha Manifaho no Mama-bolu, tersa ne’e, halo atividade dezifenta ba repartisaun Estadu nian iha Munisípiu Manufahi hodi komemora loron konsulta popular ka referendu ba dala-22 (30 agostu 1999-30 agostu 2021).

Antes ne’e Munisípiu Manufahi prepara atu komemora loron Konsulta Popular, 30 agostu 2021, maibé tanba orientasaun hosi Governu sentrál katak munisípiu hotu-hotu tenke suspende komemora loron referendu ne’e, maka Manufahi troka fali ho atividade dezinfeta ba repartisaun  Estadu nian iha Manufahi.

“Ha’u hanesan autoridade másima iha Manufahi, hahú horiseik no ohin, hamutuk ho ita-nia ekipa voluntáriu NUBER’S ho Unidus koordena ho ekipa voluntáriu Mama-bolu hosi Dili mai halo dezinfeta ba repartisaun Estadu nian iha Munisípiu Manufahi,” Administradór Munisípiu Manufahi, Arantes Isaac Sarmento, informa  ba Agência Tatoli liuhosi telefónika, tersa ne’e.

Nia afirma, atividade dezinfeta ba repartisaun  Estadu sira iha Manufahi mak hanesan, Banku Nasionál Komérsiu Timor-Leste (BNCTL-sigla portugés), Komandu Polísia Nasionál Timor-Leste (PNTL) Manufahi, Administrasaun Munisípiu, Sentru Saúde Same, Sentru Maternidade no Internamentu, Igreja no izolamentu sira, inklui edifísiu Sekretariadu Tékniku Administrasaun Eleitorál (STAE) Manufahi.

Nia dehan, atividade ne’ebé sira hala’o ne’e nia objetivu mak oinsá prevene propagasaun COVID-19 tanba repartisaun Estadu sira refere, funsionáriu sira loroloron sempre hala’o atendimentu direita ba komunidade.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here