Diretóra Jerál-MJED PPI, Odilia das dores UNG Martins. Imajen Tatoli/Egas Cristovão

DILI, 31 agostu 2021 (TATOLI) – Programa eskola ba uma no tele-eskola ne’ebé Ministériu Edukasaun Juventude Desportu (MEJD) prepara ba estudante sira iha territóriu nasionál hetan ona publikasaun hosi Radio Televizaun Timor-Leste, Empreza Públiku (RTTL, E.P) hamutuk episode 135.

Diretora Jerál Polítika Planu no Inkluzaun Ministériu Edukasaun Juventude no Desportu (MEJD), Odilia das Dores UNG Martins, hateten MEJD prepara ona matéria hamutuk episode 202 maibé publikasaun atinje ona episode 135 sei falta episode 30 iha faze finalizasaun. Nune’e tempu besik sei intriga ba RTTL atu bele halo publikasaun.

Odilia hateten maske programa ne’e rasik hetan ona kooperasaun ho RTTL, E.P atu halo publikasaun, maibé nia konsidera katak iha área rurál sei difisil atu asesu programa eskola ba uma no tele-eskola. Maibé MEJD ho manorin sira halo mós rezumu matéria hodi fornese ba estudante sira to’o área remotas atu bele asesu.

“Ita garante tanba foin lalais ita-nia ekipa lojistiku sira halo ona distribuisaun rezumu matéria ba to’o eskola sira iha área remotas depois mak profesór sira bele distribui fali ba estudante sira,” Odilia informa ba jornalista sira hafoin asina akordu ho Prezidente Konsellu Administrasaun RTTL, E.P iha edifísiu RTTL, Caicoli, tersa ne’e.

Nia afirma katak programa ne’e implementa iha tinan kotuk bainhira COVID-19 komesa ameasa rai-laran,  no Estadu TL dekreta Estadu emerjénsia.

Odilia implementasaun programa ne’e hetan kooperasaun ho RTTL, E.P  intensaun atu responde nesesidade labarik sira-nian iha pandemia COVID-19.

Enkuantu Diretora ne’e afirma katak akordu entre MEJD no RTTL rasik konkorda ona katak hosi programa ne’e rasik MEJD sei selu  $2.000 ate  $3.000 ba RTTL,E.P.

Prezidente Konsellu Administrasaun RTTL, E.P, José António Belo ‘Taraleu’. Imajen TATOLI/Egas Cristóvão

Prezidente Konsellu Administrativa RTTL, E.P José António Belo konsidera katak antes ne’e akordu entre MEJD ho RTTL la konsta kustu osan ruma iha ne’ebá, maibé RTTL mós sei la kobra Estadu ho kustu ne’ebé kompletu hanesan estasaun privadu sira seluk.

“Ita iha kustu uitoan mak prevee ona purvolta $200.00 kada episode tanba ita konsiente mezmu RTTL hanesan empreza públiku maibé hanesan mós instituisaun estadu ida. Tan ne’e ita hamutuk ho MEJD hadi’a de’it kontratu tanba prosesu publikasaun lao tiha ona,” José Belo hateten.

Jornalista   : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here