iklan

EDUKASAUN, BAUCAU, HEADLINE, MUNISÍPIU

Profesór 62% iha Baucau simu ona vasina

Profesór 62% iha Baucau simu ona vasina

Diretór Servisu Edukasaun munisipál Baucau, Augusto Hornai Ximenes. Imajen TATOLI/Natalino Belo

BAUCAU, 31 agostu 2021 (TATOLI)–Diretór Servisu Edukasaun Baucau, Augusto Hornai Ximenes, hateten, kuaze maioria profesór simu ona vasina, enkuantu atividade aprendizajen aula prezensiál daudaun ne’e suspende provizóriu relasiona ho implentasaun serka sanitária iha Baucau.

“Ita to’o ona 1.373 ho 62% hosi totál profesór 2.215 no kampaña vasinasaun kontinua la’o,” Diretór Servisu Edukasaun informa ba Agência TATOLI, iha ninia knaar fatin, tersa ne’e.

Servisu Edukasaun kontinua simu orientasaun hosi Ministériu Edukasaun, Juventude no Desportu  (MEJD) no fó sai informasaun ba diretór eskola ensinu hotu iha Baucau atu partisipa másimu ba kampaña vasinasaun.

Maski nune’e, nia parte labele obriga tanba laiha despaixu eskrita ruma hanesan sai baze legál atu profesór hotu tenki vasina.

“Mínimu ne’ebé Governu fó sai tenke atinje 70%, tanba ne’e ha’u espera Baucau sei atinje. Tanba knaar profisionál kada loron tenki hasoru estudante barak, entaun tenki vasina nune’e bele prevene-an hosi moras pandemia ne’ebé sirkula iha Timor-Leste,” nia akresenta.

Daudaun ne’e, Servisu Edukasaun Baucau simu ona karta hosi Ministériu Saúde atu hahú rekolla dadus estudante idade hosi tinan 12 to’o 17 ne’ebé tuir planu sei vasina iha fulan-setembru ou novembru tinan ne’e.

Totál númeru eskola hahú hosi pre-eskolár to’o ensinu sekundáriu tékniku vokasionál hamutuk 243, kompostu hosi pre-eskolar 30, ensinu báziku sekundáriu hamutuk 185 no ensinu sekundáriu jerál 23 no tékniku vokasionál hamutuk lima.

Totál estudante hahú hosi ensinu pre-eskolar to’o ensinu sekundáriu tékniku vokasionál hamutuk 41.255 no profesór 2.215.

Jornalista : Natalino Belo

Editora      : Julia Chatarina

iklan
iklan

Leave a Reply

iklan
error: Content is protected !!