Komandante Humberto Gonçalves “Nehek”. Imajen/Espesiál.

DILI, 31 agostu 2021 (TATOLI)—Parlamentu Nasionál (PN) tersa ne’e aprova votu pezár ba saudozu Humberto Gonçalves “Nehek” ne’ebé hakotu iis iha loron 22 agostu hodi rekuñese kontribuisaun iha prosesu luta ba libertasaun nasionál.

Votu pezár ba Komandante Humberto Gonçalves “Nehek” aprovadu ho rezultadu votasaun a-favór 24, kontra 0 no abstensaun 0.

“Votu pezár ba Komandante Humberto Gonçalves pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Komisaun Permanente nian.

Proponente ba proposta ne’e mai hosi Deputadu José Agostinho ‘Somotxo’, tanba kuñese didi’ak Komandante Nehek nia kontribuisaun iha prosesu funu ba libertasaun nasionál.

“Ha’u kuñese señor Humberto liuhosi televizaun, kuandu nia komanda forsa ba fronteira, nia nu’udar komandante ida-ne’ebé ezemplár hahú kedas iha loron dahuluk ho espíritu nasionalizmu no patriotizmu ne’ebé forte tebes. Tan ne’e mak motiva ami sira-ne’ebé ikus mai tuir ezemplu ida-ne’e,” Somotxo haktuir.   

Biografia

Humberto Gonçalves moris iha loron 10 agostu 1936, iha aldeia Kota Boot, suku Tiarlelo, postu administrative Atsabe, munisípiu Ermera.

Iha tinan 1947, Humberto Gonçalves hahú eskola primária iha Atsabe no hetan selesaun hosi Governu portugés hodi ba kontinua estudu iha Lisboa, ne’ebé termina Quarta Classe iha 1950 iha Koléjiu Nuno Alves Pereira. Nune’e, kontinua estudu iha Koléjiu Pina Maique da Casa Pia, iha Lisboa to’o 1958.

Fila mai Timor-Leste iha 1959, iha sekuénsia aprovasaun pedidu hosi Ministru Kolónia no Ultamar Governu Portugés nian, hodi komprimenta ba serbisu militár.

Humberto Gonçalves tama iha ezérsitu portugés iha 1960 to’o 19 agostu 1975 ne’ebé graduadu ho patente Primeriu-Sarjentu Infantaria, ne’ebé destakadu iha Kuartél-Jenerál Taibessi, Dili.

Iha loron 20 agostu 1975, adere ba Movimentu Kontra Golpe ne’ebé realiza hosi Frente Revolusionária Timor-Leste Independente (FRETILIN), no hola-parte liman kro’at Povu nian Forsa Armada Libertasaun Nasionál Timor-Leste (FALINTIL).

Iha prosesu luta ba libertasaun nasionál, Komandante Humberto Gonçalves “Nehek” komanda kompañia ida-ne’ebé espulsa forsa invazór sira-ne’ebé tenta okupa Balibo no Batugade.

Nune’e mós Komandante Nehek lidera timor-oan sira ho forma ezemplár no inkansável, ne’ebé área ka distánsia ne’ebé luan no atravesa indomável korrente mota enre Balíbo no Loes, risku tebes.

Iha 2010, kondekoradu ho Medalla Ordem Nicolau Lobato hodi Prezidente Repúblika, José Manuel Ramos Horta. Komandante Humberto Gonçalves “Nehek” sempre iha korajen, umildade no profundu sentidu onra.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here