Ema ho Defisiénsia hatudu talentu iha área desportu iha komemorasaun loron mundiál ba Ema ho Defisiénsia ne’ebé hala’o iha Palásiu Prezidente Nicolau Lobato. Imajen/Mídia PR.

DILI, 31 agostu 2021 (TATOLI)—Diretór Nasionál Promosaun Direitu ba Ema ho Defisiénsia Ministériu Solidaridade Sosiál no Inkluzaun (DNPDED-MSSI), Mateus da Silva, hateten MSSI seidauk re-verifika dadus bolsa da mãe ba Ema ho Defisiénsia (EhD) sira iha territóriu nasionál.

Notísia Relevante: Governu fó ”Bolsa da Mãe” ba Ema ho Defisiénsia hamutuk 582

Diretór Nasionál Promosaun Direitu ba Ema ho Defisiénsia, Mateus da Silva. Imajen TATOLI/Osória Marques.

“MSSI seidauk re-verifika dadus bolsa da mãe ba Ema ho Defisiénsia (EhD) sira-ne’ebé Governu fó tanba orsamentu iha momentu ne’ebá laiha no defísil tebes ita atu hala’o ida-ne’e. Ida-ne’e mak sai dezafiu ba ami, nune’e to’o agora ita transfere osan ba Ema ho Defisiénsia maibé ita mós lahatene ema sira-ne’e sei moris hotu ka lae,” Diretór ne’e’ hateten ba Agência TATOLI, iha nia knaar fatin, MSSI Caicoli, Dili, tersa ne’e.

DNPDPD nia papel mak halo planu atu hetan aprovasaun no hetan osan hodi halo re-verifika dadus, maibé planu ne’e la aprova entaun DNPDED labele la’o tanba desizaun ne’e hosi na’in ulun sira.

“Ita iha planu halo peskiza nasionál ida atu oinsá identifika Ema ho Defisiénsia sira ne’ebé Governu fó bolsa da mãe ne’e sei moris hotu ka lae. Tanba bainhira Governu implementa, ita seidauk re-verifika dadus ne’e to’o agora,” nia dehan.

Re-verifika ba dadus Ema ho Defisiénsia (EhD) ne’e presiza tebes, tanba ne’e DNPDED esforsu nafatin atu buka planu halo re-verifika, nune’e hatene duni ema hira mak sei ativa iha prosesu simu bolsa da mãe ne’e.

Nia dehan EhD iha territóriu nasionál ne’ebé hetan ona bolsa da mãe hosi ema ho defisiénsia fíziku hamutuk na’in-582, kompostu hosi ema defisiénsia mentál hamutuk na’in-56 (mane 20, feto 36), defisiénsia liman-ain laiha hamutuk na’in-ualu (mane 5, feto 3), defisiénsia mentál (hanoin) iha na’in-12 (mane 5, feto 7).

Defisiénsia iha moris hotu mak na’in-6 (mane 3, feto 3), defisiénsia tilun no mudo hamutuk na’in- 16 (mane 8, feto 8), defisiénsia matan (la haree) hamutuk na’in-29 (mane 18, feto 11), defisiénsia matan (haree la moos) na’in-283 (mane 143, feto 140), no defesiénsia tilun (diuk) iha na’in-256 (mane 124, feto 132).

Asisténsia sosiál ba Ema ho Defisiénsia (EhD) ne’e asegura iha Konstituisaun RDTL Artigu 56 (Seguransa no tulun sosiál nian) ne’ebé hateten; (1) Sidadaun hotu-hotu iha direitu ba seguransa no asisténsia sosiál, tuir lei haruka; (2) Estadu hola medida sira tuir nia kbiit nasionál nian, hodi halo organizasaun ho nia sistema ida ba seguransa sosiál; no (3) Estadu apoia no fiskaliza, tuir lei, ba serbisu no funsaun instituisaun solidariedade sosiál nian, no seluk tan ne’ebé nu’udar interese públiku la buka lukru ka funan.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here