Diretór Nasionál Promosaun Direitu ba Ema ho Defisiénsia, Mateus da Silva. Imajen TATOLI/Osória Marques.

DILI, 31 agostu 2021 (TATOLI)—Diretór Nasionál Promosaun Direitu ba Ema ho Defisiénsia Ministériu Solidariedade Sosiál no Inkluzaun (DNPDED-MSSI), Mateus da Silva, enkoraja EhD atu submete proposta ba Ministériu Ensinu Superiór, Siénsia no Kultura (MESSK) hodi bele asesu eskola iha Ensinu Superiór

Notísia Relevante: MSSI haree injustisa no lakohi tau Ema ho Defisiénsia iha kotuk

“Ha’u hanoin katak ita hotu ita direitu ne’ebé mak hanesan tantu defisiénisa no la’ós defisiénsia. Tanba ne’e, husu ba maluk defisiénsia sira atu submete ita-boot sira-nia proposta ba MESSK hodi konkorre atu asesu ba Ensinu Superiór. Tanba ne’e, ha’u enkoraja sira atu hato’o pedidu ruma, atu bele responde imi-nia nesesidade liu-liu asesu ba eskola,” Diretór ne’e hateten ba Agência TATOLI, iha nia knaar fatin, Caicoli, Dili, tersa ne’e.

Nia dehan, servisu hotu-hotu iha Timor-Leste sempre kompleta malu tantu nia defisiénsia ka lae, tanba Ema ho Defisiénsia no la’ós ema ho defisiénsia hamutuk mak halo dezenvolvimentu ba rai ida-ne’e.

“Ita hamutuk mak bele dezenvolve ita-nia rain ne’e ba iha futuru ne’ebé mak di’ak no armónia. Ita ema normál mesak sei labele maibé sei kompleta mós ho ita-nia maluk defisiénia sira. Ne’ebé, ami foti maluk defisiénsia sira hanesan kapitál umanu ne’ebé mak importante tebes, nune’e imi labele hanoin ka sente mesak. Maibé ita hotu hamutuk hafoin halo dezenvolvimentu iha ita-nia rain,” nia dehan.

Maske Governu troka hela de’it maibé ida-ne’e la’ós kestaun, tanba importante mak halo tratamentu dignu ba ema ho defisiénsia sira hanesan ho ema normál sira iha Timor-Leste.

Tanba ne’e, MSSI asina akordu ho MESSK atu EhD mós bele asesu ba universidade maibé servisu hamutuk ho Ministériu Administrasaun Estatál (MAE), nune’e orienta ninia autoridade lokál sira atu oinsá identifika EhD sira-ne’ebé akaba ona ninia estudu iha sekundáriu.

Ho ida-ne’e, DNPDED husu atu líder komunitariuu sira hatama sira-nia proposta ba pontu fokál MSSI nian iha munisípiu sira, nune’e ema ho defisiénsia sira bele asesu ba Ensinu Superiór.

“Kona-ba EhD atu asesu ho Ensinu Superiór, ita servisu no halo koordenasaun hamutuk ho MAE atu halo movimentasaun hodi oinsá identifika EhD. Ami tékniku akompaña MAE katak bainhira identifika ne’e autoridade lokál mak hatene liu no sira mak koñese mós nia populasaun iha suku no aldeia laran,” nia dehan.

Notísia Relevante: Ema ho difisénsia sei menus asesu edukasaun

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here