Atividade iha Merkadu Taibesi, tersa (31/8/2021). Imajen Tatoli/Antonio Goncalves

DILI, 31 agostu 2021 (TATOLI)-Koordenadór Merkadu Taibessi, António Manuel de Araújo, rekomenda ba auroidade kompetense atu bele monta bee tanke iha merkadu refere hodi fasilita negosiante ho kompradór sira fase-liman.

“Tanke ba fase-liman nian Merkadu Taibesi monta fatin tolu liuliu ba odamatan boot atu tama bamMerkadu, maibé daudaun ne’e rua aat ona hela ida de’it, maibé bee atu enxe ba tanke hodi fase-liman de’it mós laiha,” António Manuel de Araújo ba Agência Tatoli iha Merkadu Taibesi, Dili, tersa ne’e.

Nia hatutan, Merkadu Taibesi presiza tebes tanke bee fas- liman nian hodi monta fila-fali nune’e komunidade ne’ebé atu mai hola nesesidade bázika iha merkadu tenke fase-liman, tanba númeru COVID-19 iha Dili agora kada loron aumenta.

Kona-ba atividade merkadu nian, nia dehan, Merkadu Taibessi sei limita asesu transporte públiku sira, hanesan taxi no mikrolete tanba, tuir orientasaun ne’ebé mak munisípiu haruka ba sira katak tenke limita fatin balu ba transporte públiku.

Merkadu Taibesi rasik ekipa seguransa loroloron kontinua fó avizu ba kompradór no vendedór sira katak bele halo movimentu iha merkadu laran tenke halo tuir nafatin protokolu prevensaun COVID-19 nian, hanesan tama iha merkadu tenke uza máskara, halo distansiamentu fíziku, uza hand sanitizer ka fase-liman.

Tuir observasaun Agência Tatoli iha terrenu nota katak, númeru kompradór sira iha merkadu Taibesi daudaun hahú menus kompara antes aplika konfinamentu domisiliáriu jerál, nune’e kompradór no vendedór sira kumpre nafatin protokolu prevensaun COVID-19 nian.

Hatán ba preokupasaun tanke bee fase-liman nian ne’ebé iha Merkadu Taibesi la funsiona, Adjuntu Prezidente Autoridade Munisípiu Dili, António Moniz Calau hateten, sira-nia parte simu ona proposta, daudaun ne’e ekipa tékniku tun ona halo levantamentu ne’ebé iha tempu sei estabelese fila-fali tanke fase-liman nian iha Merkadu Taibesi.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here