MJED ho RTTL,E.P nota entendimentu kona-ba programa eskola ba uma no teleeskola. Caicoli, tersa (31/08). Imajen Tatoli/Egas Cristovão

DILI, 31 agostu 2021 (TATOLI) – Ministériu Edukasaun Juventude no Desportu (MEJD) ho Radio Televizaun Timor-Leste, Empreza Públiku (RTTL,E.P), tersa ne’e, asina akordu  hodi apoiu publikasaun programa eskola bá uma no tele-eskola ba estudante sira iha territóriu nasionál.

Diretór Jerál Polítika Planu no Inkluzaun Ministériu Edukasaun Juventude no Desportu (PPI, MEJD), Odilia das Dores UNG Martins,  hateten durante ne’e MEJD hein hela oportunidade atu bele aselera prosesu publikasaun programa eskola ba uma no tele-eskola ba estudante sira iha territóriu nasionál. Maibé ohin MEJD ho RTTL, E.P bele kontinua realiza tan programa eskola ba uma no tele-eskola ba estudante sira tanba RTTL mantein ninia prinsípiu hodi apoiu kanál sira iha RTTL atu bele tulun publikasaun programa eskola ba labarik sira iha uma maske pandemia COVID-19.

“Ami hanoin katak iha tempu serka sanitária no mós konfinamentu obrigatóriu jerál ne’e hakarak ka lakohi obriga duni ita-nia oan sira iha uma de’it. Maibé prosesu ida ne’e ita tenke hala’o atu bele tama iha faze ida hodi tulun ita-nia oan sira iha ensinu aprendizajen maske sira iha uma de’it,” Odilia das Dores UNG Martins haktuir.

Nia iha esperansa katak kooperasaun servisu ho RTTL, E.P ne’e bele fó oportunidade no biban ba MEJD atu aselera liután programa sira ne’ebé mak hala’o ona durante ne’e..

Iha biban ne’e, Prezidente Konsellu Administrasaun RTTL, E.P José António Belo hateten kooperasaun entre RTTL, E.P ho MEJD ne’e realiza dezde 2016, maibe iha konteúdu balun ladún fó benefísiu bá impresa públiku ne’e entaun RTTL, E.P husu bá MEJD atu hadi’a konteúdu balun bazeia ba dekretu lei Governu nian katak  RTTL nu’udar empreza públika ne’ebé kontratu konsesaun entre RTTL ho Governu hahú 2012.

“Renegosiasaun ne’e ami husu ba Ministériu Edukasaun atu hadi’a konteúdu iha parte empreza públika, atu nune’e, RTTL bele hatama mós reseita ba Estadu. Maske RTTL kontinua kontribui bá polítika Estadu nian, maibé kontinua hatama reseita mós,” tenik José António.

Nia informa katak antes ne’e la konsta reseita sira iha akordu sira. Ne’e-duni sira husu molok atu kontinua implementa programa sira hosi MEJD rasik tenke iha fali renovasaun kontratu atu bele loke oportunidade ba RTTL, E.P bele hetan reseita iha programa sira.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here