Diretór Ezekutivu ANAAA, Edmundo da Silva Viegas. Imajen/UNILAB

DILI31 agostu 2021 (TATOLI)—Diretór Ezekutivu Ajénsia Nasionál Akreditasaun no Avaliasaun Akadémia (ANAAA), Edmundo da Silva Viegas, informa ANAAA suspende atividade avaliasaun ba kursu hitu iha Ensinu Superiór lima iha semana ida-ne’e, tanbá Governu implementa konfinamentu domisiliáriu.

Notísia Relevante: ANAAA kontinua halo avaliasaun ba kursu rua iha ISC

“Iha loron 27 agostu to’o 02 setembru ne’e, ami tenke suspende avaliasaun ba kursu hitu mak rua iha UNITAL, ida iha UNPAZ, ida iha IOB, ida iha ISC no rua iha UNTL, tanbá Governu implementa ona konfinamentu domisiliáriu niha Dili,” Edmundo da Silva Viegas hateten ba Agência Tatoli, iha nia knaar fatin, Balide, Díli, tersa ne’e.

Bainhira haree ba situasaun COVID19 ne’e la pior ona mak ANAAA halo planu atu hahú hikas avaliasaun iha loron neen (6) fulan-setembru hodi avalia kursu Edukasaun Fisika ho Desportu iha Universidade Nasional Timor Lorosa’e (UNTL).

ANAAA nia vizita avaliasaun ba kursu sira-ne’e, iha ambitu akreditasaun programátiku ne’ebé ANAAA hahú iha loron 16 agostu no to’o iha 26 agostu ne’e, ANAAA foin konsege avalia kursu lima.

Iha loron 27 agostu ne’e tanbá Govenu implementa ona konfinamentu domisiliáriu entaun ANAAA konsulta ho Ministériu Ensinu Superiór, Siénsia no Kultura (MESSK), Prezidente Konsellu Diretivu no mós parte tékniku hosi ANAAA nian rasik, hotu-hotu preokupa ho saúde tanba variante Delta COVID19 ne’e da’et maka’as tebe-tebes.

“Ami mós informa ona ba instituisaun sira katak iha kursu balun ne’ebé mak presiza suspende lai, ligadu ho Governu implementa konfinamentu domisiliáriu ne’e,” nia dehan.

Entretantu, ba kursu lima ne’ebé ANAAA konsege avalia hanesan kursu Floresta, Peska, Enfarmajen, Direitu iha Universidade Oriental Timor Lorosa’e (UNITAL), no Enfarmajen iha Institutu Superior Cristal (ISC) nian.

Enkuantu ba kursu hitu ne’ebé daudaun ne’e ANAAA suspende hela mak hanesan kursu Administrasaun Públika no Saúde Públika iha UNITAL, kursu Enjeñaria Sivil iha Universidade da Paz (UNPAZ), kursu Kontabilidade Komputadór iha Institute of Business (IOB), kursu Parteira iha (ISC), no kursu Farmásia no Ensinu Língua tetun iha Universidade Nasional Timor Lorosa’e (UNTL).

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here