Logotipu FFTL no Bandeira RDTL. Imajen/FFTL

DILI, 31 agostu 2021 (TATOLI) – Adjuntu Sekretáriu Jerál Federasaun Futeból Timor-Leste (FFTL), Frederico Martins hateten, to’o agora seidauk hetan fatin seguru hodi selesaun nasionál U-23 no seniór hala’o treinamentu tanba Dili tama hela Konfinamentu Obrigatóriu (KO) no Ministériu Saúde la autoriza hala’o treinamentu.

Notísia Relevante : FFTL Deside Treinadór Hosi Brazíl Kaer Selesaun Nasionál U-23

“Ita seidauk hetan fatin seguru ida ba jogadór sira halo treinamentu, deside ona Maliana, maibé ami haree ba risku liu tanba besik fronteira, entaun ami sei haree munisípiu seluk ne’ebé besik,” Frederico hateten ba Agência Tatoli liuhosi komunikasaun WhatsApp, tersa ne’e.

Nia dehan, FFTL haree ona Baucau no Manufahi atu lori jogadór sira ba hala’o treinamentu, maibé sei iha faze preparasaun halo teste swab ba jogadór sira.

Agora daudauk jogadór sira tama ona ba treinamentu fíziku nian no importante tebes ba jogadór sira atu pratika kada loron, bainhira paradu kleur mak fó impaktu ba jogadór sira nia fíziku bainhira hala’o jogu.

Jogadór iha selesaun nasionál U-23 no seniór hamutuk na’in-30 no ofisiál na’in-hitu (7).

Kona-ba jogu kualifikasaun AFC Cup sei la adia tanba kalendáriu fiksu ona no Timor-Leste iha obrigasaun boot atu ba partisipa, se kuandu la partisipa mak sei hetan sansaun hosi FIFA no AFC rasik.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here