Vizita Vise-Ministru Turizmu, Komérsiu no Indústria, Domingos Lopes Antunes, ba fatin produsaun Souro Coconut Oil, iha Lautém. Imajen/MTKI

DILI, 31 agostu 2021 (TATOLI)–Diretór kompañia Souro Cocounut Oil Cipriano Felix Unipessoal LDA, Arsénio Cabral, iha ona planu iha tempu besik halo exportasaun mina virjin ba Estadu Unidu Amérika (EUA).

“Foin daudaun iha semana kotuk, ami konsege halo exportasaun mina virjin tonelada neen no daudaun ami planu hela atu exporta tan tonelada 10 ba Estadu Unidu Amérika (EUA),  ne’ebé iha hela prosesu trata dokumentu,” Diretór kompañia informa ba Agência TATOLI, via telefónika, tersa ne’e.

Nia dehan, presu mina virjin iha rai-li’ur no rai-laran diferente, tanba ne’e kompañia nasionál ne’e simu mina hosi produtór no buka embalajen no halo stiker hodi tau iha produtu.

“Presu rai-li’ur ita fa’an la to’o $5, iha rai laran litru 5 ita fa’an $25.” Nia akresenta.

Mina virjin ne’e tama ona iha merkadu mundiál no site venda online hanesan Amazon ne’ebé nasaun barak mak bele asesu no sosa.

Aleinde ne’e, Souro Cocounut Oil Cipriano Felix tama programa Cesta Bázika hamutuk tonelada 20.

“Ha’u-nia fábrika ne’e bele prodús loron ida tonelada ida to’o rua. Maski iha situasaun pademia, maibé produsaun mina virjin la’o nafatin,” nia hatutan.

Daudaun ne’e kompañia Souro Cocounut Oil ne’ebé ho fábrika iha suku Souro, postu Lospalos villa, munisípiu Lautém, akumula traballadór hamutuk 25 ne’ebé serbisu iha fábrika produsaun mina-nuu no daudaun iha ona hanoin atu halo produsaun iha munisípiu seluk.

Souro Cocounut Oil daudaun ne’e fa’an ona iha Dili, hanesan loja agrikultór no Leader.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here