Embaixada Timor-Leste iha Japaun hamutuk ho Estudante timoroan sira ne’ebé estuda iha Japaun selebra loron Konsulta Popular, 30 Agustu 2021, liuhosi zoom meeting. Imajen/Espsiál

DILI, 31 agostu 2021 (TATOLI) – Embaixada Timor-Leste iha Japaun hamutuk ho Estudante timoroan sira ne’ebé estuda iha Japaun selebra loron Konsulta Popular, 30 agostu 2021, hodi Estabelese Asosiasaun Estudante Timoroan iha Japaun (AETJ) liuhusi zoom meeting.

Embaixadór Timor – Leste iha Japaun Ilídio Ximenes da Costa, hato’o nia mensajen ba estudante Timoroan sira katak, espiritu  patriotizmu no nasionalizmu importante  tebes atu kuda iha estudante sira-nia hanoin atu nune’e sira bele estuda ho didi’ak iha rai Japaun.

“Atu bele fasilita komunikasaun ne’ebé di’ak entre Estudante sira, estudante ho Embaixada, meus di’ak liu mak harii organizasaun Estudante Timoroan iha Japaun ho nune’e bele fasilita no tulun estudante foun sira ne’ebé atu ba estudu iha universidade sira iha Japaun no ajuda estudante sira ne’ebé iha problema durante estudu,” Embaixadór Ilídio Ximenes hateten liuhosi komunikadu ne’ebé Tatoli asesu, tersa ne’e.

Estudante iha Japaun ne’ebé eleitu ba Prezidente asosiasaun estudante timoroan iha Japan, Melisa Alifa da Costa, estudante hosi Sophia University hateten, objetivu harii asosiasaun ne’e atu nune’e bele fasilita malu entre estudante iha ema nia rain ho di’ak.

“Ha’u halo ona peskiza ka survey ba 198 estudante no alunu sekundária sira iha Timor-Leste, maioria sira  ladún hatene no ladún iha informasaun kona-ba  eskola no bolsa estudu iha Japaun, ho razaun hirak ne’e mak, Asosiasaun Estudante hari ho objetivu atu halibur estudante Timoroan hotu-hotu, espresa sira nia hanoin, hametin unidade entre estudante no fó asisténsia akadémiku no apoiu psikolójiku ba estudante Timoroan sira ne’ebé afeta sira nia estudu durante hala’o sira nia estudu,  transmite  informasaun  kona-ba estilu moris no kultura Japanese, promove Timor-Leste nia kultura ba komunidade Japonés no promove edukasaun ba Juventude Timor oan sira ne’ebé hakarak kontinua sira nia eskola iha Japaun,” nia dehan.

Durante diskusaun, estudante sira demokratikamente, kandidata no hili sira nia estrutura  Asosiasaun Estudante Timoroan liuhusi eleisaun ho sistema polling zoom online no rezultadu husi votasaun Melissa Alifa da Costa eleitu hanesan Presidente, Olderico da Silva hanesan Vise no Geovania Garret Mouzinho Freitas hanesan Sekretária.

Jornalista   : Hortencio Sanchez

Editór            : Francisco Simões

HAKEREK NO HATÁN

Please enter your comment!
Please enter your name here