Imajen/Espesiál.

DILI31 agostu 2021 (TATOLI)—Sentru Treinamentu Claret (CTC, sigla portugés) Salele, durante ne’e kapasita joven sira iha área konstrusaun iha departamentu lima mak soldadura, karpintária, pedreiru, eletrisidade, no kanalizasaun.

“Objetivu, hosi formasaun ba área konstrusaun ne’e, hanesan bainhira formandu sira remata ona formasaun ba área konstrusaun ida ne’e, atu sira bele hatene konabá servisu tékniku nian, hanesan oinsa sira halo uma, hosi fondasi to’o uma ne’e remata,” Formadór Sentru Treinamentu Claret (CTC, sigla portugés) Salele, Domingos Maria Jose, hateten ba Agência Tatoli, via telefónika, tersa ne’e.

Matéria ne’ebé fó hanorin ba partisipante sira kona-bá konstrusaun nian liu-liu oinsá sira atu hatene halo uma no halo instalasaun ba fiu eletrisidade nian iha uma laran, no instalasaun kanu ba bee-moos, no solda buat ruma ne’ebé relasaun ho servisu uma nian.

Ba tinan ne’e, atividade formasaun iha Sentru Treinamentu Claret, konsege hala’o ona formasaun ba semana haat ho formandu hamutuk 48 no formandu ba área otelária nian hamutuk 26.

“Atividade formasaun ne’ebé tama ba semana haat dadaun ne’e la’o hela, maski ba dadaun ne’e ema dehan ema sira mai swab iha eskola ne’e positivu barak, maibé ami la para. Tanbá dahuluk sira halo kuarentena iha eskola de’it no daruak aminia formandu sira la sai hosi fatin ne’e, entaun sira bele ba eskola, fila mai iha área eskola de’it no depois filafali ba koléjiu,” nia informa.

Atividade formasaun kontinua la’o tanba sentru ne’e nafatin kumpre regra prevensaun COVID-19 ne’ebé Ministériu saúde no Organizasaun Mundiál Saúde (OMS) fo sai hanesan fase liman, uza maskára no halo distansiamentu sosiál.

Sentru formasaun ne’e harii iha tinan 2005, atu kapasita joven sira-ne’ebé hela iha área rurál, la asesu ba eskola iha nível altu no mós ba joven sira-ne’ebé asesu ba eskola maibé la termina sira-nia estudu.

Hosi 2005 to’o 2021 formandu hamutuk 1.748 mak tuir ona formasaun iha sentru ne’e, hosi númeru ne’e iha 700-resin mak hetan ona servisu iha instituisaun Governu, kompañia, no balun kria servisu rasik.

Área formasaun ne’ebé sentru ne’e iha, hanesan agrikultura, otelária no konstrusaun. Totál fungsionáriu no formadór iha sentru ne’e hamutuk ema na’in16. Totál formandu ne’ebé durante ne’e tuir formasaun iha área konstrusaun hamutuk 1.022.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here