Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

DILI31 agostu 2021 (TATOLI)—Asosiasaun Halibur Defisiente Matan Timor Leste (AHDMTL) ho Sekretáriu Estadu Juventude no Desportu (SEJD) tersa ne’e asina akordu hodi apoia membru AHDMTL ba partisipa kongresu kona-bá arte no kultra ne’ebé realiza iha Hungaria.

Notísia Relevante: AVI apoiu $9.999 ba AHDMTL promove dansa tradisionál

“Ohin, ita asina akordu ho SEJD ne’e, tanbá ita-nia divizaun arte no kultura nia koordenadór atu ba partisipa kongresu iha Hungaria kona-bá arte no kultura, atu nune’e ita-nia grupu arte no kultura ne’e mós bele tama iha asosiasaun mundiál,” Diretór Ezekutivu Asosiasaun Halibur Defisiente Matan Timor-Leste (AHDMTL), Gaspar Afonso, informa ba Agência Tatoli, via telefónika, tersa ne’e.

Asina akordu ne’e, SEJD fó apoia fundu ho totál $5.120 ne’ebé aloka ba kustuu viajén no akomodasaun ba AHDMTL nia membru ida, atu ba partisipa kongresu kona-bá arte no kultura iha mundu iha Hungaria.

“Objetivu ne’e, tanbá kada nasaun sei partisipa hodi asegura ita-nia patrimóniu kultura orijinál kada nasaun nian no ita mós atu sai membru ba asosiasaun refere,” nia dehan.

Iha kongresu ne’e, partisipante sira aprende kona-bá ba dahuluk Timor-Leste atu rejistu hodi sai membru ba organizasaun sumbrinha ba arte no kultura iha mundu ne’e, atu nune’e aban-bainrua bele hetan konvite ba rai-li’ur hodi promove Timor-Leste nia dansa kultura ba mundu liuhosi ema ho defisiénsia matan sira.

Ho kongresu ne’e, membru AHDMTL ne’e sei aranka iha loron 22 outubru no sei fila-fali mai iha Timor-Leste iha loron 03 fulan-novembru tinan 2021.

Membru AHDMTL ne’ebé atu ba partisipa kongresu iha Hungaria mak hanesan Koordenadór ba Promosaun Sosiál Inkluzaun, Adriano do Santos.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here