Seremónia pose estrutura kooperativa kréditu Roman Nicolau Lobato, iha suku Fahilebo, segunda (30/08). Imajen/SEKoop

DILI, 30 agostu 2021 (TATOLI)–Sekretáriu Estadu kooperativa, Elizário Ferreira, fó pose ba estrutura kooperativa kréditu Roman Nicolau Lobato iha suku Fahilebo, postu administrativu Bazartete, munisípiu Liquiçá no husu atu hamorin nafatin naran saudozu.

“Keta haluha lori naran santu ne’e, naran ida patriótiku ne’e labele halo kooperativa ne’e mate, kuandu halo mate, nia rasik sei babeur imi, tenke halo nia moris ba bebeik atu dada ema hotu mai no vizita iha fatin ne’e sai fatin turizmu ba ema hotu, hatudu katak uluk Prezidente Nicolau Lobato ninia kooperativa fatin maka ne’e,” Sekretáriu Estadu hateten iha seremónia pose iha suku Fahilebo, hanesan haktuir iha nota ne’ebé agência TATOLI asesu, iha segunda ne’e.

Governante ne’e dehan, bainhira deside halo sede kooperativa tenke atrai ema atu vizita tanba nu’udar fatin ne’ebé antes ne’e Saudozu Nicolau Lobato halo atividade.

“Aban bainrua, bainhira kooperativa ne’e deside harii sede iha Saudozu Nicolau Lobato) nia to’os komunál, tenke halo mós hanesan fatin turizmu, atu nune’e aban bainrua ema mai vizita imi dehan fatin ne’ebé uluk Saudozu halo atividade, agora ami harii filafali to’os ba kooperativa,” Sekretáriu Estadu hameno.

Nune’e, governante ne’e promete sei apoiu fasilidade no formasaun ba kooperativa kréditu Roman Nicolau Lobato hodi bele funsiona di’ak liután ba oin.

Iha fatin hanesan, Administradór postu Bazartete, João Braz, hateten, kooperativa ne’ebé mak Saudozu Nicolau Lobato harii iha tempu rezisténsia, nia rezultadu mak oras ne’e daudaun ema hotu sente hela hanesan ukun-an.

Enkuantu, rezultadu kooperativa kréditu Roman Nicolau Lobato sei naruk no la hotu tanba jerasaun sira tuir mai sei kontinua tuir mehi.

“Uluk ita-bo’ot sira hahú ho asosiasaun, karik ema rona maibé la koñese asosiasaun ne’e iha ne’ebé, la’o mesak, buka malu maibé ema laiha atu foti osan, maibé ho kooperativa ita-bo’ot sira-nia liras sei naruk no tutan ba tan ema hotu ne’ebé interese, sira sei hakarak sai membru no kooperativa kréditu ne’e sei naroman ba babeik,” nia subliña.

Iha sorin seluk, Prezidente kooperativa kréditu Roman Nicolau Lobato, Marcelino da Cruz, hateten,  kooperativa  ne’e hahú ho asosiasaun ne’ebé hanaran Naroman, ne’ebé harii iha loron 29 marsu 2011.

Ikus harii fali grupu USP iha loron 27 marsu 2013, ho atividade empresta no rai osan, ho totál membru hamutuk na’in-22, kompostu hosi feto 10 no mane 12, ho osan inisiál $198.

Ikus mai, loron 30 agostu, grupu ne’e nakfilak sai kooperativa kréditu Roman Nicolau Lobato, ho membru 134, kompostu hosi feto 67 no mane 67, ho kapitál hamutuk $1.412.

Razaun hamosu kooperativa kréditu Roman Nicolau Lobato tanba iha tinan 1974, Saudozu Nicolau Lobato halo hela to’os komunál agrikultura produsaun ai-han iha suku fahilebo.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here