Antoninho da Silva Pinto.

Hosi:

Antoninho da Silva Pinto

 

“Oras to’o ona atu ita hili…..” muzika furak ne’ebé ita rona kuaze dader to’o kalan husi TVRI Timor-Timur, RRI, RTK no seluk-seluk tan durante prosesu tomak referendum nian, desde hahú resensiamentu to’o loron konsulta populár 30 agostu 1999.

Muzika ne’e hafanu no motiva povu doben Timor tomak tantu iha rai laran no rai liur, iha sidade to’o área remotas, hotu-hotu bo’ok an bá fatin resensiamentu no hakat ba sentru votasaun sira hodi halo desizaun krusiál tuir idak idak nia konsiénsia.

Desizaun ne’ebé povu tomak hili mak hakotu luta naruk ba libertasaun. Povu ne’ebé konsidera nu’udar rakyat jelata, GPK nsst, enfrenta terror no intimidasaun oi-oin até hola ho dezenvolvimentu inklui fahe hahán no osan barak maibé tan de’it mehi atu hetan liberdade no ukun rasik aan no inspiradu ho palavra mate ka moris, ukun rasik aan haforte povu doben Timor-Leste maioria hodi firme hili opsaun númeru 2 ne’ebé simboliza ho mapa Timor no bandeira lulik CNRT nune’e lori hikas roman foun mai rai doben ne’e ho naran sagradu RDTL.

Tinan 21 liu ona no ita goza liberdade ne’ebé furak tebes tan laiha ona intimidasaun no teror, laiha ona pemeriksaan KTP, laiha ona insultu, violasaun oi-oin, tortura nsst. Mesmu sei enfrenta injustisa oi-oin maibé la todan liu saida mak existe no povu tomak sofre antes 1999.

Espera ho selebrasaun loron espesiál ida ne’e inspira fali Timor oan tomak, hahú husi povu bai-bain to’o ba lideransa másima sira hahú husi ema riku to’o ema kiak sira, hahú husi ema sidade to’o ema área remotas hodi tau hanoin hamutuk no halo asaun ho alvu ida de’it atu harahun injustisa ne’ebé existe, nune’e bele atinje mehi ba libertasaun totál no kompletu no sei sai aliserse ba misaun lulik transforma RDTL sai nasaun riku, forte no seguru iha tempu prezente to’o futuru.

Uluk povu maioria ho hanoin ida de’it vota ba opsaun ukun rasik aan, agora mos ita tenke hanoin ida de’it apoio luta foun ba liberta povu.

Ita apoiu ona ita-nian Estadu (PR, PN, PM no Tribunál) ne’ebé uluk delega ona ita nia lider karismátiku Kay Rala Xanana Gusmão hodi ba luta no konsege define ona ita nia fronteira tasi nian nune’e iha posibilidade hodi dada mai ita nia teritóriu mina rai ne’ebé konsidera nu’udar riku soin bo’ot povu no rai doben TL nian.

Husu liu-liu ba jerasaun foun ne’ebé 1999 idade ladauk to’o ba vota maibé agora imi nia idade liu 17 ona nune’e imi iha ona biban atu halo istória iha imi nia vida kona-ba partisipasaun iha luta ba libertasaun liu liu libertasaun povu, imi nia partisipasaun la’ós liuhusi vota de’it maibé fornese imi nia apoiu liuhusi estuda iha edukasqun formál, non formál atu sai ema matenek ne’ebé bele garante tranzisaun jerasionál ne’ebé kualidade no prontu kompete ho ema iha mundu rai klaran.

Timor nia oan doben hirak ne’ebé hetan ona oportunidade serbisu iha instituisaun ka kompañia ruma tantu iha rai laran no mós rai liur,  husu atu serbisu fó laran, serbisu ho dedikasaun no responsabilidade aumesmu tempu buka atu aprende barak liután, nune’e bele serbisu ho kualidade, tanba susesu iha idak idak nia serbisu, tantu diretamente no mós indiretamente sei kontribui ba Timor-Leste nia bem estar no halo parte ba luta libertasaun povu.

Dadauk ne’e mundu inklui Timor-Leste enfrenta hela luta foun ne’ebé halo parte ba libertasaun povu mak luta kontra inimigu invizivel COVID-19, nune’e husu ita hotu, liu liu foinsae Timor oan atu fornese mos ita nia apoiu orasaun no asaun pozitivu, liu-liu garante de’it pás no estabilidade iha idak-idak nia fatin, kumpre no halo ema kumpre regras saúde nian atu prevene transmisaun COVID-19, liu liu variante foun delta ne’ebé mos infiltra ona iha ita nia rai doben, nune’e sei kontribui signifikativamente ba Timor-Leste nia liberdade no hakmatek ho nune’e Estadu sei luta ho konfiansa no ita iha konfiansa bo’ot katak vitória sei a favór ba povu no rai doben Timor-Leste atu liberta hikas povu nu’udar parte importante ba libertasaun totál no kompletu ne’ebé bele sustenta Estadu no bem estar povu Timor-Leste ba futuru ne’ebé prosperu.

Saudasoens libertasaun populár

Viva referendum

Viva povu doben TL

Viva RDTL

Hakerek nain nu’udar Alumni UNTL- FCE – Biologia (2001) no fundadór Grupu Foinsae Kreativu Liquiçá (FoTi Liquiçá)

Email : toninhosilvapinto@hotmail.com

HAKEREK NO HATÁN

Please enter your comment!
Please enter your name here