Timoroan deportadu bainhira to’o iha fronteira Batugade sábadu (21/08). Imajen/PNTL.

BAUCAU, 30 agostu 2021 (TATOLI)–Prezidente Konsellu Kombatente Libertasaun Nasionál Baucau, Fernando ‘Beredu’u’ Gusmão, husu Governu foti medida forte hasoru sidadaun ne’ebé hakat fronteira ilegál tanba bele fó risku ba nasaun no povu iha situasaun pandemia.

“Ukun-na’in sira tenke tau atensaun, moras COVID-19 besik tinan-rua ona, bainhira la atensaun sira ba beibeik, ita mak sei terus. Tanba ne’e tenki foti medida forte no kastigu, karantina karik han mesak hahán, la’ós Estadu mak fó han tanba la’ós Estadu mak haruka sai,” Prezidente Konsellu Kombatente Baucau hateten iha ninia rezidénsia, Villa nova, segunda ne’e.

Veteranu ne’e nota katak iha situasaun daudaun ne’e, kuaze atividade hotu paradu tanba pandemia, maibé movimentu ilegál iha fronteira loron ba loron kontinua aumenta.

Notísia relevante: Autoridade seguransa Indonézia deporta timoroan 352 mai TL

Antes ne’e, Polísia Nasionál Timor-Leste (PNTL) munisípiu Baucau simu orientasaun hosi komandu PNTL nasionál atu Baucau sai fatin izolamentu ba sidadaun hamutuk 198, ne’ebé autoridade Indonézia detein no deporta ona.

Komandu PNTL Munisípiu Baucau liuhosi servisu konjunta ho Sentru Intergradu Jestaun Krize (CIGC, sigla portugés) Baucau simu sidadaun deportadu iha loron sábadu 21 agostu maizumenus tuku 22:00 no daudaun ne’e iha ona Jináziu Baucau (GOR, sigla Indonézia) hodi kumpre protokolu saúde molok kontinua prosesu administrativa no legál.

Sidadaun sira kompostu hosi feto lima no mane 193, hosi munisípiu ualu hanesan na’in 78 hosi Ermera, Dili 28, Covalima 21, Baucau rua, Viqueque lima no restu hosi munisípiu seluk.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here