Médiku-sira, prepara hodi oferese vasina ba komunidade iha Sentru Saúde Comoro, segunda (30/08/21). Imajen Tatoli/António Gonçalves.

DILI, 30 agostu 2021 (TATOLI)—To’o ohin, Timor-Leste (TL) rejista ema na’in 62 mak mate ho COVID-19, no husi númeru ne’e maioria seidauk simu vasina.

“Iha ona ema na’in 62 mak mate ho COVID-19, inklui ema na’in 14 ne’ebé mate iha semana kotuk. Númeru ema mate asosiadu ho COVID-19 ne’ebé mak aumenta sa’e iha semana ne’e, demonstra prevalénsia a’as hosi COVID-19 grave, ne’ebé agora dadaun iha TL. Taxa fatalidade kazu (mate por kazu) iha semana kotuk mak 0.6%. Hosi ema adultu hamutuk 59 ne’ebé mak mate ho COVID-19 iha Timor-Leste até agora, 57 (97%) mak seidauk simu vasina,” Komunikandu epidemolójika ne’ebé Tatoli asesu, segunda ne’e.

Notísia relevante:COVID-19, óbitu tolu no pozitivu 166

Desde 01 marsu 2021, iha ona ema hamutuk na’in 471 ho moras COVID-19, mak presiza ona hospitalizasaun.

Númeru hospitalizasaun ne’e inklui de’it ema-sira ho moras moderadu, grave no krítiku, ne’ebé presiza halo tratamentu iha fasilidade saúde espesializadu ba COVID-19.

Iha semana kotuk, kazu hamutuk 96 mak baixa iha hospitál tantu Vera Cruz ou Lahane ou HNGV ou hospitál referál sira-seluk. Ida-ne’e hanesan númeru kazu ne’ebé mak tama hospitál barak liu, desde inisíu pandemia.

Taxa ba insidensia, ne’e sukat kona-bá númeru kazu konfirmadu, iha populasaun ida kada loron, no baibain nia sukat ka halo medida hanesan, kazu  pur 100,000, populasaun  iha kada loron.

Durante semana kotuk, teste iha Laboratoriu HNGV no Laboratoriu Nasionál Saúde hamutuk  6,061/1,777 ka 29.3% mak pozitivu kompara ho 24.7% iha periúdu relatóriu anteriór.  

Prevalénsia COVID-19 nian iha Dili ne’e bele estimadu, bazeia ba proporsaun hosi ema sira ne’ebé mak teste pozitivu ba COVID-19, bainhira sira halo teste antes atu viajen saihosi serka sanitária.

Iha loron hitu, komesa hosi loron  22– 28 agostu 2021, iha totál hamutuk ema na’in 1,551 mak halo ona teste ba intensaun ida-ne’e 456 (29.4%) mak hetan pozitivu.

Hosi ida-ne’e, bele uza hodi halo kalkulasaun ba prevalénsia no kalkulasaun ida ba intervallu konfiansa nian 95%, hatudu katak COVID-19 nia prevalénsia atuál iha Dili, ne’e mak entre 27.2% no 31.7%.

Bazeia ba estimasaun prevalensia ida ne’e, provavel katak iha ema besik 100.000 iha Dili mak agora daudaun infetadu ho COVID-19. Ida ne’e espesialmente sai risku ba ema sira ne’ebé mak seidauk simu vasina kompletamente.

Maisumenus vasina COVID-19 nia doze hamutuk 55.000 mak administra ona iha semana kotuk. To’o iha loron 29 fulan agostu 2021, vasina COVID-19 nia doze primeiru hamutuk 387.597 mak administra ona, iha Timor-Leste, reprezenta 51.3% hosi populasaun ne’ebé elijível ho idade hosi tinan 18 ba leten.

To’o iha loron 29 fulan agostu 2021, ema hamutuk 195.400 mak simu ona sira nia doze segundu ba vasina COVID-19 nian, iha Timor-Leste, reprezenta 25.9% hosi populasaun sira ne’ebé mak elijível ho idade 18 ba leten.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here