Símbolu rua (CNRT ho Autonomia) iha bulletin de votu bainhira povu ba vota iha loron konsulta popular iha 30 agostu 1999. Imajen/dok. Espesiál

COVALIMA, 30 agostu 2021 (TATOLI) – Vise-presidente Konsellu Veteranu Munisipál Covalima, Osorio Soares “Mausoko”,  hateten, tinan ne’e, komunidade labele selebra loron konsulta populár ba dala-22  (30 agostu 1999-2021) tanba Governu liuhosi Konsellu Ministru deside impoin serka sanitária (SS)  iha Covalima tanba pandemia COVID-19.

Tuir  loloos, ohin, ita selebra festa boot hodi fó onra ba loron konsulta popular, maibé ita kumpre hela serka sanitária(SS)  nune’e ita la bele  hasa’e bandeira no labele halibur malu,” Mausoko haktuir ba  Agência Tatoli liuhosi telefónika, segunda ne’e.

Maske lá realiza serimónia hodi komemora loron konsulta populár, tinan ne’e, maibé komunidade sira importante tenke kontribui ba Governu nia desizaun.

Osório mós husu ba veteranu no veterana sira atu labele envolve aan iha organizasaun ilegál no monu ba manobra polítiku sira-nian. Maibé veteranu tenke hamriik metin ho Governu hodi servisu hamutuk ho instituisaun Estadu nian.

Loron 30 Agostu 1999, sai nu’udar loron istóriku no importante ba Timor-Leste. Maske hasoru intimidasaun no violasaun oi-oin, maibé iha loron ida ne’e povu iha territóriu Timor-Leste, Indonézia, Australia no Portugál sai husi sira nia uma nakonu ho esperansa hodi fó sira nia votu ba  opsaun atu hamutuk ho Indonézia  separa husi Indonézia.

Sentru Votasaun ba Konsulta Populár hamutuk 200 mak estabelese iha Timor laran tomak. Totál populasaun ne’ebé rejistu atu vota hamutuk  451,792 no husi totál ne’e, 98.5% mak ba vota ho rezultadu votu 94.388 ba autonomia  no votu 344.580 ba CNRT (Concelho Nacional Resistencia Timorense). Nune’e, termina Timor-Leste nia destinu no futuru hodi haketak an hosi Nasaun Repúblika Indonézia ka hosi NKRI (Negara Kesatuan Republik Indonesia).

Jornalista   : Celestina Teles 

Editór        : Francisco Simões

HAKEREK NO HATÁN

Please enter your comment!
Please enter your name here