COVID-19.

DILI, 29 agostu 2021 (TATOLI)-Xefe Sentru Saúde Iliomar, Postu Administrativu Iliomar, Munisípiu Lautem, Narcosio Camões, informa Postu Administrativu Iliomar daudaun ne’e deteta abitante na’in-sia (9) pozitivu COVID-19.

Nia afirma, komunidade ne’ebé afetadu ba COVID-19 ne’e tanba foin lalais tour FALINTIL ba dala-46 ne’ebé kona liu Iliomar membru FALINTIL-Forsa Defeza Timor-Leste (F-FDTL) toba kalan ida halo kontaktu fíziku ba komunidade balu ho mós misa agradesimentu ba Pe. Celestino da Costa, SDB ne’ebé simu knaar Amu-lulik nian iha loron 14 agostu 2021.

“Iha momentu misa ne’e ema barak mai hosi Dili halo kontaktu fíziku, entaun bainhira festa ne’e ramata maioria iha sintoma hotu ne’ebé sesta (27/08/2021), sira mai Sentru Saúde ita halo teste swap hamutuk 18, loron  lori ba laboratóriu Lospalos rezultadu fó sai na’in-sia pozitivu COVID-19, ida negativu no na’in ualu seluk rezultadu seidauk fó sai,” Narcosio Camões ba Agência Tatoli liuhosi telefónika, domingu ne’e.

Nia hatutan, na’in-sia ne’ebé pozitivu COVID-19 lori ona ba izolamentu Lospalos no na’in rua seluk halo auto izolamentu iha Iliomar.

Kona-ba família pozitivu daudaun parte pesoál saúde Iliomar seidauk halo teste masál ba família pozitivu COVID-19 tanba ekipa ba teste swap nian hotu.

“Ami informa ona ba laboratóriu Munisípiu Lautem bainhira sira haruka ona sasán mai, ami sei halo teste swap ba família pozitivu COVID-19, maibé daudaun ne’e ami fó avizu nafatin ba komunidade katak kumpre nafatin protokolu kombate COVID-19 nian hanesan uza máskara, fase- liman ho sabaun  beibeik no distansiamentu fíziku,” nia hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here