Komandante PNTL Covalima, Superintendente António Maria de Sá. Imajen TATOLI/Celestina Teles

COVALIMA, 28 agostu 2021 (TATOLI)Komandu Polísia Nasionál Timor-Leste (PNTL) Covalima rejista sidadaun na’in-190 hakat fronteira terrestre liu dalan ilegál, hosi fronteira Alto Lebos, postu administrativu Lolotoe, munisípiu Bononaro.

“Iha Covalima, rejista joven 190 liu dalan ilegál bá Indonézia hodi sa’e sintu no iha munisípiu Baucau, Dili no Ermera ho númeru 700, maibé Autoridade Indonézia deporta fila mai Timór, ho situasaun hanesan ne’e hatun ita-nia dignidade nasaun,” Komandante PNTL Covalima, Superintendente António Maria de Sá, informa ba Agência TATOLI, iha ninia knaar fatin, Covalima, sábadu ne’e.

Notísia relevante: Timor-oan 198 ultrapasa liña fronteira Indonézia tama ona izolamentu Baucau

Tuir Superintendente António Maria, joven sira ne’e konsege hakat fronteira tanba fasilita hosi oknum individuu seguransa balun.

“Tanba ne’e, hosi parte seguransa, Komandu prosesa ona no la kleur foti ona desizaun ba sira,” nia akresenta.

Daudaun, joven hirak ne’e kumpre hela kuarentena durante loron 14, hafoin sira sei kumpre prizaun oras 72 hodi kontinua prosesu ba Tribunál.

“Rai ne’e atu di’ak ou lae fila ba ita rasik. Ita iha responsabilidade no dever atu kuidadu ita-nia rai,” nia hatutan.

Komandante Polísia ne’e rekoñese, ho rai maran no tasi ne’ebé luan tebes, Timor-Leste nia rekursu seidauk naton atu kontrola tomak fronteira ho nasaun viziñu, tanba ne’e presiza mós kontribuisaun hosi sidadaun hotu.

“Husu ita-bo’ot sira-nia apoiu no koloborasaun, ita serbisu hamutuk, konsiénsia atu tuur hakmatek no evita ultrapasa fronteira bá Indonézia liuhosi dalan ilegál,” nia dehan.

Tuir dekretu-lei númeru 18/2021 ne’ebé hahú vigora, aplika koima hosi $30 to’o $250 ba kualkér ema ne’ebé hakat fronteira liu dalan ilegál.

Enkuantu, iha períodu Estadu Emerjénsia, Governu deside hasa’e tan valór koima tanba aplika koima $30 númeru movimentu ilegál iha fronteira terrestre kontinua aumenta.

Sidadaun ne’ebé komete hakat fronteira terrestre liu dalan ilegál iha situasaun pandemia, autoridade seguransa sei lori tama kuarentena hodi kumpre durante loron 14, hafoin kontinua prosesu legál.

Jornalista : Celestina Teles

Editora      : Julia Chatarina

HAKEREK NO HATÁN

Please enter your comment!
Please enter your name here