Ekipa Maliana United (roupa mutin) no Maria-Tapo (roupa matak) halo kontratake ba malu iha jogu finál Sub 22 époka 2021, iha Estádiu Malibaka Yamato Maliana, iha sábadu (28/08). Imajen TATOLI/Sérgio da Cruz

BOBONARO, 28 agostu 2021 (TATOLI)–Klube Maliana United (MU) sesesu okupa terseiru lugar iha jogu finál Sub 22 époka 2021, hafoin halakon Maria-Tapo ho rezultadu 8:0, ne’ebé realiza iha Estádiu Malibaka Yamato Maliana, munisípiu Bobonaro, sábadu ne’e.

Vitória ne’e, halo Treinadora MU, Elisa Pires, sente orgullu ho rezultadu ne’ebé nia jogadór sira hatudu no otimista iha jogu tinan oin mai, nia klube bele sai kampiaun.

“Susesu ida-ne’e liuhosi ami-nia esforsu, tamba ha’u sempre haka’as ami-nia jogadór hodi intensifika treinu, badinas, pasiénsia, no disiplina, tanba ne’e ami sei la mantein iha pozisaun ida-ne’e deit, ba oin kontinua esforsu tan atubele sai kampiaun tamba ha’u fiar hau-nia jogadór sira,” Treinadora hateten ba Agência TATOLI, iha Estádiu Malibaka Yamato Maliana.

Jogu entre ekipa rua, desde inísiu la’o ho tensaun maka’as tamba fó presaun ba malu iha liña oin atu prodús golu, maibé oportunidade monu uluk ba Maria-Tapo tamba Defeza MU hamonu Avansadu Maria-Tapo iha área risku no ikus mai Árbritu deside fó penalidade, maibé oportunidade brillante ne’e Avansadu númeru 19 la konsege ezekuta ho susesu tamba bola sa’e liu guardiaun.

Ho rezultadu falla ne’e, hamosu tan MU nia forsa atu ataka iha liña klaran, hodi fó presaun maka’as ba defeza adversáriu, nune’e Jogadór Rosalino Barros (5) konsege fura uluk rede adversáriu hodi muda rezultadu ba 1:0, nune’e liu de’it minutu 16, Avansandu MU, Gabriel Gomez Pires (11) prodús tan golu ida hodi muda rezultadu ba 2:0 to’o termina jogu faze dahuluk.

Nune’e, kontinua ba jogu faze daruak, ekipa rua konsege halo kontratake ba malu, Maria-Tapo Jogu ho modelu ofensivu no MU joga kalma, maibé hamate iha Avansadu Maria-Tapo nia presaun.

Jogu kontinua la’o, MU aumenta tan sira-nia forsa, muda jogu ba ofesivu hotu iha minutu 53, oportunidade nafatin monu ba MU hodi fura tan golu ida hosi Avansadu Artur Soares (23) hodi muda ba 3:0.

Ho rezultadu ne’e, halo adeptus MU hamanas liután situasaun jogu hodi motiva liután jogadór hodi badinas buka bola no ikus mai sira konsege jogu ho modelu meiu kampu, ne’ebé halo presaun maka’as iha liña oin, ikus mai Jogadór  Noel Mauluta (20) fura tan golu ida iha minutu 69 no Jogadór ne’e fura tan nia golu daruak hodi muda skor ba 5:0.

Rezultadu festa golu ne’e, halo sira-nia Treinadora kontente liután no troka hotu jogadór rezerva, nune’e oportunidade nafatin ba MU, ne’ebé Jogadór Rosalino Barros fura tan golu ida iha minutu 75.

Tuir tan Jogadór Candido dos Santos (99) fura tan golu rua tutuir malu hodi muda skor ba 8:0

Ho rezultadu ne’e mantein to’o Árbritu deside hakotu jogu iha minutu 90 hodi fó Vitória ba Ekipa MU, enkuantu Maria-Tapo okupa kuartu lugar iha jogu Sub 22 époka 2021.

Hafoin ramata jogu, Jornalista Agência TATOLI tenta entrevista ho Treinadór klube Maria-Tapo, maibé laiha fatin.

Jogu ne’e lidera hosi Árbritu lokál, Jefriano Loy Maia dos Santos, Asistente 1 Lucas Felix, Asistente 2 Domingos Vicente no Árbritu Mateus Marques.

Tuir oráriu hosi Asosiasaun Futebol Bobonaro (AFB), jogu finál Sub 22 époka 2021 entre  Madiran FC kontra Monumento FC, hahú aban tuku 16:00 lorokraik iha Estádiu Malibaka Yamato Maliana.

Jornalista : Sérgio da Cruz

Editora     : Julia Chatarina

HAKEREK NO HATÁN

Please enter your comment!
Please enter your name here