Pesoál saúde-sira hala’o preparasaun molok teste swab Covid-19 ba komunidade iha Sentru Integradu Jestaun Krize (SIJK), kuarta (25/08/21). Imajen Tatoli/António Gonçalves.

DILI, 27 agostu 2021 (TATOLI)—Postu vasinasaun kontra COVID-19 iha munisípiu Dili kontinua hala’o atendimentu ba populasaun, maski Governu aplika ona konfinamentu domisiliáriu jerál liuhosi projetu rezolusaun Governu iha kuarta 25 agostu, durante semana ida.

“Serbisu saúde munisípiu Dili hamutuk ho ekipa hala’o nafatin vasinasaun iha fasilidade saúde-sira hodi hasa’e kobertura ba vasina COVID-19,” Diretora Serbisu Saúde Munisípiu Dili, Agostinha Segurado hateten ba jornalista-sira iha postu saúde fomoza II, sesta ne’e.

Notísia relevante:Sidadaun vasinadu doze dahuluk iha TL 380.300

Oras ne’e daudaun serbisu saúde munisípiu Dili estabelese postu vasinasaun hamutuk 29 iha postu  adminsitratiivu neen hanesan Metinaro, Ataúro, Dom Aleixo, Vera Cruz, Na’in Feto no Cristo Rei.

Parte serbisu saúde munisípiu Dili mós kontinua serbisu hamutuk ho autoridade lokál hodi mobiliza komunidade atu simu vasina, ne’ebé progresu hatudu katak, iha fulan agostu, númeru vasina iha Dili aumenta ba bebeik.

To’o kinta, 26 agostu 2021, ema ne’ebé simu ona vasina doze dahuluk iha Timor-Leste hamutuk 380.300 no ema ne’ebé simu ona doze daruak hamutuk 187.600.

Notísia relevante:Governu aplika hikas konfinamentu domisilariu iha Dili hahú 27 agostu

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here