Polísia Nasionál Timor-Leste (PNTL), hala'o operasaun konjuta ba loja sira ne'ebé la'os fa'an nesesidade bázika durante konfinamentu domisiliáriu jerál iha Munisípiu Dili, sesta (27/08). Imajen Tatoli/Francisco Sony.

DILI, 27 agostu 2021 (TATOLI)—Polísia Nasionál Timor-Leste (PNTL) liuhosi komandu munisípiu Dili, hala’o operasaun no sensibiliza regra konfinamentu domisiliáriu jerál  iha Estadu Emerjénsia (EE),  ba komunidade iha kapitál Dili atu bele prevene transmisaun COVID-19.

Operasaun no sensibilizasaun ne’e, ekipa konjunta hala’o hosi ekipa konjunta Polísia Unidade Tránzitu, Polísia Rezerva, Polísia Komunitária, Unidade Eskuadra-sira hodi tun ba terrenu iha área-sira hanesan Balide, Bairru-Pité, Hudi-Laran, Ai-muntin, Delta, Kampu Baru no Tasi-Tolu.

Notísia relevante:Governu aplika hikas konfinamentu domisilariu iha Dili hahú 27 agostu

Atividade ne’e Komandu munisípiu Dili hala’o tanba simu orientasaun hosi Komandu Jerál hodi implementa rezolusaun Governu ba konfinamentu domisiliáriu jerál iha Dili.

“Operasaun ida-ne’e atu informa ba komunidade no loja na’in-sira katak, obrigatoriamente kumpre no  labele viola regra,” Komandante PNTL, munisípiu Dili, Superintendente Xefe, Henrique da Costa,hateten ba jornalista-sira iha  Caicoli, sesta ne’e.

Komandu PNTL Dili kontinua hala’o operasaun rutina hodi husu ema hotu-hotu obrigatoriamente kumpre regra no bainhira la kumpre sei konsidera krime dezobediénsia hasoru autoridade públika.

Rezolusaun hosi Governu ne’ebé prodús iha 25 agostu ba konfinamentu domisiliáriu jerál iha Dili, hateten katak, iha área hotu-hotu munisípiu Dili-nian bandu transporte públiku, liuliu táxi, mikrolete no anguna atu halo sirkulasaun.

Suspende selebrasaun relijioza koletiva no bandu mós atu halo serimónia fúnebre, ne’ebé envolve partisipasaun ema na’in-sanulu liu no sira ne’ebé partisipa serimónia ne’e rasik tenke uza máskara oin, hodi taka inus no ibun inklui mantein distánsia pelumenus metru ida ho ema seluk ne’ebé prezente iha seremónia ne’e.

Estabelesimentu komersiál, industriál, artezanál ka prestasaun servisu taka ba públiku, ho exesaun ba estabelesimentu-sira ne’ebé autoriza iha Rezolusaun Governu, liuliu estabelesimentu ne’ebé fa’an ai-han no sasán nesesidade bázika, eletrisidade, telekomunikasaun, prestasaun kuidadu médiku, farmásia, postu kombustível-nian, no instituisaun finanseira-sira.

Restaurante-sira bele fornese hahán, aplika rejime take away ka entrega iha uma de’it no estabelesimentu seluk  taka ba públiku bele dezenvolve ninia atividade liuhosi serbisu entrega ba uma de’it.

Vendedór ambulante ba sasán alimentár no sasán ba nesesidade bázika bele mantein sira-nia atividade, no merkadu Manleuana ho Taibessi bele mantein funsionamentu, hahú hosi tuku 06:00 to’o tuku 18:00 otl.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here