Komandante PNTL Munisípiu Covalima, Superintendente António Maria de Sá. Imajen Tatoli/Celestina Teles

COVALIMA, 27  agostu 2021 (TATOLI) – Komandante  Polísia Nasionál Timor-Leste (PNTL) Munisípiu Covalima, Superintendente António Maria de Sá, orienta ona komandante eskuadra  iha postu administrativu hitu (7) ne’ebé pertense ba Munisípiu Covalima atu kontrola movimentu iha estrada públiku atu abitante sira hotu kumpre medida prevensaun COVID-19.

Governu impoin ona serka sanitária iha Munisípiu Covalima, nune’e Komandante António de Sá, fó orientasaun ba polísia eskuadra sira hodi haree no kontrola abitante sira la bele halibur malu, la’o sai hosi uma karik uza máskara no asegura distansiamentu fíziku.

Covalima kontinua aplika serka sanitária tanba nia kauza ita nia professor sira viajen ba Díli ladún rigór iha disiplina ho nune’e kazu pozitivu COVID-19  iha Covalima aumenta,” António de Sá hateten.

Covalima hahú implementa serka sanitária bazeia ba desizaun hosi Konsellu Ministru, iha loron 25 fulan ne’e, inklui munisípiu seluk hanesan Baucau, ho Manufahi.

Administradór Munisípiu, Covalima Francisco de Andrade hateten, maske Munisípiu Covalima aplika ona serka sanitária maibé atividade kontinua la’o normal.

“Atividade ita seidauk taka sei la’o normal no ita sei halo negosiasaun ho ministériu kompetente sira,” Francisco de Andrade tenik.

Administradór mós husu ba komunidade atu kumpre regra hosi Organizasaun Mundiál Saúde (OMS) hanesan uza máskara, fase-liman ho sabaun no distánsia sosiál.

Dadus hosi Ministériu saúde iha loron 26 fulan ne’e, kazu ativu COVID-19 Munisípiu Covalima hamutuk 334.

Jornalista   : Celestina Teles

Editór        : Francisco Simões

HAKEREK NO HATÁN

Please enter your comment!
Please enter your name here