Loron Konsulta Popular, 30 agostu 1999, populasaun sira forma ba sentru votasun hodi deside Timor-Leste nia destinu liuhosi sira-nia votu. Imajen/Dok.Espesiál.

DILI, 27 agostu 2021 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, hateten loron konsulta populár 30 agostu 1999 nu’udar loron vitória polítika ba povu Timor-Leste nian.

Nia haktuir, iha tinan 22 liubá, iha loron 30 fulan-agostu tinan 1999, Povu Timor-Leste hamriik ho aten brani deside Timor-Leste nia libertasaun no independénsia, tanba loron ne’e hanesan loron ida-ne’ebé determinante ba rezisténsia tomak, no nu’udar mós loron demokrasia no direitu umanu ba Timor-Leste.

“Loron 30 agostu 1999, nu’udar loron vitória polítika ba Timor-Leste. Povu Timor-Leste sakrifika-an dala-ida tán iha loron desizivu finál ne’e, ba nia futuru,” Prezidente Parlamentu Nasionál nia mensajen badak, iha uma fukun, sesta ne’e.

Tinan ida-ne’e, Timor-Leste labele selebra loron importante ida-ne’e ho atividade festivu, tanba ita hasoru daudaun hela pandemia COVID-19.

Maibé, Prezidente Parlamentu Nasionál ne’e husu sidadaun idak-idak kontinua refleta nafatin loron ida-ne’e nia sentidu no nia valór ba Timor-Leste, agora no iha futuru, iha idak-idak nia fatin.

“Ita-nia omenajen ba sira hotu ne’ebé mate antes, depois no iha loron referendu ne’e, atu sira-nia klamar hetan fatin hakmatek iha Lalehan, no tulun Povu tomak moris saudável, hakmatek no prósperu nafatin,” Aniceto Guterres hateten.

Ikusliu, Prezidente Parlamentu Nasionál fó parabéns ba Povu tomak, kuidadu idak-idak nia saúde, kuidadu ema seluk nia saúde no salva nasaun.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here