Imajen/BTL,E.P

DILI, 27 agostu 2021 (TATOLI)—Diretór Operasionál Manutensaun Água Saneamentu Munisípiu Dili, João de Piedade hateten, iha implementasaun konfinamentu obrigatóriu iha Dili, ekipa Água Saneamentu Munisípiu Dili kontinua fornese bee-moos ba komunidade iha oras 24 nia-laran.

Notísia Relevante: Governu aplika hikas konfinamentu domisilariu iha Dili hahú 27 agostu

“Bainhira ita-nia Governu aplika konfinamentu obrigatóriu horikalan, ha’u orienta kedas xefe sira atu ekipa task force sira iha kada zona iha kapitál nian hodi kontrola sistema bee-moos no nafatin fornese bee-moos ba komunidade iha Dili laran durante oras 24 nia-laran”, João de Piedade hatete ba Agência TATOLI, liuhosi telefónika, sesta ne’e.

Nia dehan, karik iha komunidade iha kapitál Dili mak presiza bee-moos ka sei kontinua halo pedidu ba bee-moos nian entaun ekipa prontu atu apoiu no fornese bee-moos.

Kona-ba tanke bee-moos nian iha kapitál, Diretór dehan, tanke ne’ebé monta uluk bainhira aplika serka sanitária, konfinamentu domisiliáriu no obrigatóriu, Água Saneamentu Munisípiu Dili monta ona tanke 100 maibé agora hamenus tiha 40 entaun hela tanke 60 de’it mak nafatin funsiona iha kada zona komunidade sira-nian.

“Ita nafatin ense bee ba tanke 60 ne’ebé iha komunidade nia leet hodi sira bele uza. No apoiu tanke hirak ne’e hetan suporta hosi DIFAT Austrália no iha pandemia COVID-19 ne’e sira nafatin ense bee hodi nesesita ita-nia inan-aman sira-nia nesesidade loro-loron nian” nia dehan.

Água Saneamentu esforsu mak haloos sistema bee-moos, nune’e bee bele sirkula ba kada tanke ne’ebé monta ona, maibé kona-ba jestaun atu ema labele halibur malu barak ne’e servisu autoridade lokál sira-nian, tanba sira mak bele sensibiliza ba nia populasaun sira.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here