Komandu FALINTIL-Forsa Defeza Timor-Leste (F-FDTL), hala’o enseramentu ba tour FALINTIL dalan ba dame tinan 2021, iha munisípiu Bobonaro, sesta (27/08/21). Imajen F-FDTL.

BOBONARO, 27 agostu 2021 (TATOLI)—Komandu FALINTIL-Forsa Defeza Timor-Leste (F-FDTL),  deside halo enseramentu ba tour FALINTIL dalan ba dame tinan 2021, iha munisípiu Bobonaro, tanba situasaun COVID-19 ne’ebé la permite kontinua ba munisípiu seluk.

“Ami-nia planu atu ba Suai, Ainaro no ensera iha Aileu iha 28 agostu, maibé tanba situasaun COVID-19 ami labele kontra órden Estadu. Hanesan aparellu Estadu ami mak tenke hatudu ezemplu atu ema hotu-hotu fiar. Ida-ne’e mak ohin ami hakotu iha Bobonaro,” Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Lere Anan Timur hateten ba Jornalista-sira, iha jináziu munisipál Maliana, sesta ne’e.

Notísia relevante:F-FDTL sei realiza tour dalan ba dame

Maski ensera ona, maibé Lere Anan Timur promete katak,  iha tour ne’ebé sei realiza iha tempu tuir-mai sei fó prioridade ba munisípiu tolu ne’e, nune’e povu bele hatene istória loloos hosi funu sivíl ne’ebé akontese iha Timor-Leste.

Tour FALINTIL iha tinan ne’e, hahú hosi sede partidu Uniaun Demokratika Timorense (UDT) iha 15 agostu, kontinua na parte Leste no iha Norte Liquiça, ikus-mai hakotu iha Bobonaro ne’ebé konsege hatudu rezultadu di’ak maski mosu derota ida tanba dezastre no soldadu feto ida lakon vida.

Hosi esperiénsia ne’ebé iha, Tenente Jenerál mós sei hala’o enkontru ho komandante-sira ne’ebé involve iha atividade ne’e, atu avalia serbisu hodi hadi’a sala ne’ebé akontese, nune’e prevene iha futuru.

Tour FALINTIL ne’ebé hala’o iha Bobonaro mak hanesan, lansamentu fatuk dahuluk konstrusaun edifísiu baze militár kompañia setór Norte iha área Damlara, aldeia Harame, suku aidaba-Leten, postu administrativu Atabae.

Alende ne’e, iha postu administrativu Maliana, Tenente Jenerál, Lere Anan Timur ho ekipa hala’o diálogu hodi konta istória funu sivíl ba autoridade munisipál, veteran no populasaun Bobonaro.

Jornaliata: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here