Prezidente Interinu Autoridade Dili, António Clau. Imajen Tatoli/Francisco Sony

DILI, 27 agostu 2021 (TATOLI)-Adjuntu Prezidente Autoridade Munisípiu Dili, António Moniz Calau, husu komunidade Munisípiu Dili atu evita halibur malu durante tempu konfinamentu obrigatóriu jerál iha Dili.

Nia husu ba vendedór ambulante sira atu  labele fa’an modo-tahan iha dalan públiku ka trotoar leten, nune’e evita halibur ema.

 “Orienta ona ita-nia ekipa jestaun merkadu liuliu petróleu sira hahú horiseik no ohin sei halo avizu ba komunidade iha Munisípiu Dili evita halibur malu no labele kontinua fa’an modo iha fatin públiku, nune’e evita halibur ema tanba konfinamentu obrigatóriu ne’e ita hotu presiza hakmatek iha uma hodi evita númeru transmisaun COVID-19, liuliu variante delta,” António Moniz Calau haktuir ba Agência Tatoli iha nia knaar fatin, Matadouro, Dili, sesta ne’e.

Nia dehan, bainhira komunidade hotu halo tuir regra konfinamentu obrigatóriu ne’e fiar katak númeru kazu COVID-19 ne’ebé agora daudaun sa’e maka’as iha Munisípiu Dili sei redús.

Durante Dili aplika serka sanitáriu no konfinamentu obrigatóriu funsionáriu munisípiu mós Dili sei halo servisu ho rotativu.

“Ami halo ona jestaun ba ami-nia funsionáriu Munisípiu Dili ne’ebé kontinua servisu durante aplika konfinamentu obrigatóriu  jerál mak hanesan, funsionáriu jestaun merkadu, saneamentu, funsionáriu bee-moos, no pesoál limpeza ezgotu ne’ebé iha postu administrativu haat iha munisípiu Dili, maibé ami orienta katak sira tenke servisu ho rotativu,” nia hateten.

Iha internal administrasaun munisípiu mós fó ona orientasaun ba diresaun sira hotu atu halo servisu ho rotativa liuliu funsionáriu sira ne’ebé servisu liga ho urjente sira prontu nafatin tama servisu.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here