Pesoál saúde-sira kontinua hala’o teste swab ba komunidade iha SIJK, kuarta, (25/08/21). Imajen Tatoli/António Gonçalves.

DILI, 27 agostu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu rua, pozitivu 357, rekoperadu 185 no kazu ativu 4.373.

Totál óbitu ne’ebé relata ohin, primeiru mane ida ho idade 78, timoroan, hela iha Dili, seidauk vasina no iha 24  agostu 2021 diagnóstikadu Sindroma Insufisiénsia Respiratória Aguda (SIRA), tanba COVID-19, no hahú halo tratamentu iha Vera Cruz, iha loron ne’e kedan.

Notisia relevante:COVID-19: óbitu haat, pozitivu 307 no ativu 4.203

Horikalan 19:10 matebian i’is-kotu. Familia koordena hela ho ekipa saúde sira atu hala’o funerál tuir protokolu ne’ebé adopta iha Timor-Leste.

Segundu, mane ida ho idade 58, timoroan, hela iha munisípiu Bobonaro, seidauk vasina, iha 21 agostu 2021 diagnóstikadu Sindroma Insufisiénsia Respiratória Aguda (SIRA) tanba COVID-19, no hahú halo tratamentu iha Lahane, iha loron ne’e kedan.

“Horikalan 19:10 matebian i’is-kotu. Familia kordena hela ho ekipa saúde sira atu hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, sesta ne’e.

Kazu foun ohin 357 mai hosi Dili 228, Covalima 29, Viqueque 25, Baucau 24, Ainaro 18 no munisipiu seluk hamutuk 33 ne’ebé kompostu hosi mane 188 no feto 169.

Hosi totál kazu detetadu foun ohin, ho idade 20-94 (18%) ho idade entre tinan 12-59 na’in 246 (68,9%), idade 60 mai karaik na’in 17. Hosi kazu detetadu foun ohin 168 kazu ka 47% sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o 27 agostu 2021 hamutuk 15.960. Hosi horisehik mai ohin, teste ne’ebé Laboratóriu Nasionál Saúde halo hamutuk 938 PCR, ho detallu hanesan tuir-mai, Vijilánsia sentinela na’in 73, rastreiu ba kontaktu ka Contact tracing 239, Rastreiu Aleatóriu ka Random Screening nain 337, viájen sai-hosi serka sanitária hosi Dili 254, Viájen internasionál sia, Follow up iha kuarentena na’in 26.

Totál testes PCR ne’ebé halo horisehik 26 agostu iha munisípiu-sira seluk, RAEOA no HNGV hamutuk 498, ho detalla hanesan tuir-mai, Maubisse 44, Maliana 48, Viqueque 38, Suai 115, Baucau 95,  Ermera 16,  RAEOA 44, HNGV 81 no Lospalos 17.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 25 agostu tuir sistema informasaun Saúde iha Ministériu Saúde  ho totál  kumulativu 1ª doze iha Dili (73,7%) no totál  kumulativu 2ª doze  iha Dili (56,6%).

Ema ne’ebé simu ona vasina doze dahuluk iha Timor-Leste  (50,9%) no simu ona doze daruak  (24,4%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 24,5/100 mil abitante, enkuantu ba deit munisípiu Dili,61,2/100 mil abitante.

Ohin, insidénsia Covalima ho insidénsia 32,0/100 mil abitante, tuir kedan ho munisípiu Baucau ho insidénsia 21,9/100 mil abitante, munisípiu Manufahi 14,3/100 mil abitante, munisípiu Ainaro ho insidénsia 11,3/100 mil abitante, munisípiu Manatuto ho insidénsia 10,4/100 mil abitante, hafoin munisípiu Viqueque ho insidénsia 10,1/100 mil abitante.

Dadus iha leten hatudu katak, insidénsia munisípiu Dili, munisípiu Covalima no Baucau tutuir malu a’as-liu iha Timor-Leste laran tomak, munisípiu haat seluk – Manufahi, Ainaro Manatuto, Viqueque – mós hatudu risku a’as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.

Iha loron 27 agostu  2021, izolamentu Vera Cruz, Lahane ho HNGV halo tratamentu ba kazu detetadu pozitivu na’in 86. Grave hamutuk ema na’in 23, na’in-tolu uza ventiladór, na’in-tolu uza CPAP-Continuous Positive Airway Pressure, 17 uza oksijéniu. Moderadu hamutuk ema na’in 32, kaman hamutuk ema na’in 31.

Informa ba públiku katak Governu impoin medida saúde públika ho naran konfinamentu domisiliar obrigatóriu, katak obrigatóriamente ema presiza hela iha uma  atu prevene virus SARS-CoV-2 inklui variante Delta hada’et barak liu tan iha komunidade nia le’et.

Nune’e mós, Governu impoin medida saúde públika serka sanitária – katak ema labele sirkula livremente sai ka tama hosi área serka, hodi bele prevene virus SARS-CoV-2 inklui variante Delta labele hada’et-tutan maka’as liu tan ba fatin no rejiaun seluk.

 Apela ba populasaun iha Timor-Leste laran tomak, maski karik simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e, mak hanesan uza máskara fase liman beibeik ho sabaun ka dezinfetante ruma  evita kose liman ba matan, inus ho ibun  bainhira kumprimenta malu, la presiza ka’er liman, bensa-liman, rei-malu ka haku’ak malu evita halibur malu barak  hamri’ik ka tur do’ok husi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here