Autoridade seguransa Indonézia liuhosi Komandu Polísia (KAPOLRES sígla Indonézia) Belu no Imigrasaun Indonézia, deporta tan timoroan na’in 76 mai Imigrasaun Timor-Leste (TL), sesta (27/08/21). Imajen PNTL.

DILI, 27 agostu 2021 (TATOLI)—Autoridade seguransa Indonézia liuhosi Komandu Polísia (KAPOLRES sígla Indonézia) Belu no Imigrasaun Indonézia, deporta tan timoroan na’in 76 mai Imigrasaun Timor-Leste (TL).

Timoroan na’in 76 ne’e, iha feto na’in-neen ne’ebé hetan deportasaun tanba antes ne’e hakat fronteira terrestre ho ilegál, hodi ba tuir ezame arte marsiál iha Atambua.

Notísia relevante:Indonézia deporta tan timoroan 164, na’in-tolu iha síntoma COVID-19

Informasaun ne’ebé Tatoli asesu hosi parte Sentru Integradu Jestaun Krize (SIJK), munisípiu Bobonaro, katak deportasadun ida-ne’e prosesu kontinuasaun no grupu ikus hosi timoroan-sira ne’ebé hakat ilegál ba Atambua tuir ezame arte marsiál ne’ebé voluntariamente entrega-an ba autoridade seguransa Indonzésia.

“Iha tuku 15:00  otl, autoridade Indonézia deporta sidadaun hirak-ne’e to’o ona iha área TL ne’ebé daudaun sei hala’o hela identifikasaun,” ofisiál ida hosi SIJK munisipál Bobonaro, informa ba jornalista Agência Tatoli, via telefónika, sesta ne’e.

Parte Serbisu Imigrasaun TL ho Unidade Polisía Fronteira (UPF), halo ona identifikasaun no sei entrega ba SIJK, hodi submete ba kuarentena iha Maliana, hodi loke prosesu investigasaun bainhira kumpre ona loron 14.

Tuir dekretu Governu númeru 18/2021, 1 jullu kona-bá medida ezekusaun deklarasaun Estadu Emerjénsia efetua ho dekretu Prezidente Repúblika númeru 39/2021, juñu iha artigu 7, obrigatóriu kontrola sanitária, iha alinea 4 hateten indivídu ne’ebé tama sai territóriu nasionál ho dalan ilegál sei heta koima ho valór mínimu $30 no másimu $250, maibé tenke kumpre uluk kuarentena durante loron 14, hafoin investiga no aplika multa.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here