Ilustrasaun ema tuir formasaun. Imajen/Espesiál

DILI27 agostu 2021 (TATOLI)—Assosiasaun Edukasaun ba Moris Di’ak Timor-Lorosa’e (AEMD-TL), sabádu (28/08) sei realiza formasaun online kona-bá “Learning How to Learn” ba partisipante na’in-50.

Presidente Programa Assosiasaun Edukasaun ba Moris Di’ak Timor Lorosa’e (AEMDTL), Manuel Pereira da Costa Nunes, informa katak formasaun ne’e sei hahú iha tuku 09h00 no sei remata iha tuku 11h00 dadeer, hodi bele transforma partisipante sira-nia hanoin atu estuda ho diák.

“Objetivu hosi aminia formasaun ne’e atu transforma sirania hanoin no hanoin sira konabá oinsá bele estuda ho di’ak, atu sira aban bainrua labele abandona buat ne’ebé sira aprende ona. Forma sira atu labele sai hanesan ema-ne’ebé hein de’it, tanbá ita aprende la’os atu hatene de’it, maibé aprende ne’e atu ita bele halo buat ruma iha itania moris,” Manuel Pereira da Costa Nunes, hateten ba Agência Tatoli, liuhosi telefónika, sesta ne’e.

Iha formasaun ne’e, AEMD-TL sei foku liubá ba saida mak estuda no saida mak aprende, no AEMD-TL mós sei ko’alia liu tan kona-bá bareira tolu ne’ebé halo estudante ka partisipante sira lakohi atu kontinua ba sira-nia estuda.

“Bareira tolu ne’e hanesan ko’alia kona-bá estuda la iha imajen. Bainhira estuda la iha imajen, entaun sei halo estudante sira matan dukur, baruk, halo sira la iha vontade. Estuda hela maibé sira-nia hanoin la ba iha matéria ne’ebé sira estuda, ida ne’e ko’alia kona-bá bareira dahuluk,” nia dehan.

Bareira daruak, sei ko’alia kona-bá estuda etapa por etapa, ne’e signifika katak bainhira estudante sira la estuda etapa por etapa, entaun sei halo sira konfuzaun no sei halo sira husik hela saida mak sira estuda no la komprende.

Bareira datoluk sei koa’alia kona-bá, la komprende ka komprende sala, hanesan estudante sira balun lee hela, hanesan lee hosi dahuluk to’o remata, bainhira sira taka kadernu, sira nunka hanoin hetan saida mak sira estuda. Dala ruma profesor/a esplika seluk, sira-nia adaptasaun oin seluk ka profesór sira husu pergunta seluk, sira hatán fali buat seluk.

AEMD-TL halo ona sensibilizasaun no halo ona peskiza kona-bá programa foun ne’e ba estudante iha eskola sira, no bele dehan katak estudante hamutuk 75% mak hakarak atu estuda maibé sira sei hasouru hela problema kona-bá estuda no aprende nian.

“Entaun, ho programa ida-ne’e, ami na’in hira mak eskola, no ami hetan programa ne’e hosi Amerika, no ami hakarak fahe fila-fali ba ami-nia maluk joventude no estudante sira, atu nune’e bele kompleta malu di’ak liután no bele lori ita-nia nasaun ne’e ba oin,” nia dehan.

Totál formandu ne’ebé tuir formasaun ne’e hamutuk 50, ne’ebé mai hosi estudante universidade iha Díli laran hanesan Universidade Nacional Timor Lorosa’e (UNTL), Institute of Business (IOB), Universidade Díli (UNDIL), Universidade da Paz (UNPAZ), no Universidade Oriental Timor-Lorosa’e (UNITAL).

Totál membru no formadór hosi Assosiasaun Edukasaun ba Moris Di’ak Timor-Lorosa’e (AEMD-TL) hamutuk 10 no sira mesak lisensiadu/a.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here