Armajen SAMES rejionál Baucau. Imajen TATOLI/Natalino Belo

BAUCAU, 26 agostu 2021 (TATOLI)–Xefe Departamentu Unidade Armajen Servisu Autónomu Medikamentu no Ekipamentu Saúde (SAMES) Baucau, João Cancio Ximenes Ornai, hateten, stock aimoruk daudaun ne’e sufisiente atu distrubui bazeia ba pedidu ne’ebé hato’o ona hosi fasilidade saúde iha rejionál Baucau.

Xefe Departamentu Unidade Armajen SAMES Baucau, João Cancio Ximenes Ornai. Imajen TATOLI/Natalino Belo

Stock aimoruk iha unidade armajen rejionál Baucau sufisiente atu responde ba nesesidade servisu saúde munisipál, ospitál rejionál no fasilidade saúde hotu, ne’ebé iha armajen rejionál Baucau kobre 76% ba leten,” Xefe Departamentu hateten iha ninia knar fatin, kinta ne’e.

João esplika, durante fulan-agostu nia laran, SAMES rejionál nafatin halo distribusaun bazeia ba pedidu hosi Servisu Saúde munisipál Baucau, Lautém, Manatuto no Viqueque inklui Hospital Regional Eduardo Xemenes (HorEX).

Tuir regulamentu interna SAMES, normalmente servisu saúde halo relatóriu hodi submete ba diresaun nasionál farmásia atu aprova, hafoin enkamiña ba servisu nasionál no despaixu mai rejionál, mak foin distribui fali ba servisu saúde, nune’e distribui tutan ba sentru, postu saúde inklui ospitál rejionál.

“Maioria sira husu aimoruk konsumável inklui oksijéniu hodi halo atendimentu durante ne’e,” nia akresenta.

Kona-ba oksijéniu, mensalmente SAMES Baucau hato’o pedidu ba nasionál hamutuk silindru 40 hodi atende ba fasilidade saúde, maibé iha fulan-jullu pedidu aument tanba iha izolamentu balun mak utiliza relasiona ho afetadu COVID-19 hahú barak.

Xefe Departamentu Unidade Armajen SAMES Rejionál Baucau , João Cancio Ximenes Ornai, esplika kona-ba lala’ok distribusaun aimoruk ba fasilidade saúde iha rejionál Baucau, kinta (26/08). Imajen TATOLI/Natalino Belo

“Ita-nia konsumu ba oksijéniu hahú sa’e, entaun bazeia ba relatóriu iha silindru ne’ebé ita utiliza pur volta silindru 90 resin,” nia hatutan.

Maski nune’e, João garante stock aimoruk no ekipametu, nune’e kualker tempu ou situasaun ne’ebé enfrenta bele fornese ba fasilidade saúde.

Stock oksijéniu nafatin disponível iha ne’e, iha 40 resin ne’ebé foin lalais ita distribui ba sentru izolamentu, liuliu ba sentru Intergradu Jestaun Krize (CIGC, sigla portugés) Baucau ita fó silindru 40,” nia tenik.

Enkuantu, stock ekipamentu COVID-19 hanesan máskara no ekipamentu seluk ne’ebé uza ba sala izolamentu sira sufisiente.

Total stock iha armajen SAMES rejionál Baucau hamutuk 453, kompostu hosi medikamentu hamutuk 263, konsumável 159, ekipamentu médiku hamutuk tolu, radiolojia 12, laboratóriu tolu, medikamentu espesiál hamutuk rua no oksijéniu rua.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here