Pesoál saúde iha Sentru Saúde Formoza, prepara hela vasina AstraZeneca, kuarta (04/08). Imajen TATOLI/Francisco Sony

DILI, 26 agostu 2021 (TATOLI)—Governu sei fó apoiu finanseiru ba kazu mate ka inkapasidade tanba vasina kontra COVID-19, maibé sei liuhosi avaliasaun médika hodi komprova.

“Verifikasaun ba situasaun mate ka inkapasidade tanba vasina kontra COVID-19 sei hala’o liuhosi avaliasaun médika no Ministériu Saúde (MS) maka sei responsável ba rekoñesimentu direitu apoiu ne’e,” refere nota ne’ebé Agência TATOLI asesu, iha kinta ne’e.

To’o agora MS seidauk konfirma ka informa Konsellu Ministru kona-ba kazu ruma ne’ebé komprova ona.

Antes ne’e, Governu liuhosi reuniaun Konsellu Ministru aprova Projetu Dekretu-Lei loron 21 jullu 2021, ba kriasaun apoiu finanseiru ba kazu mate ka inkapasidade tanba rezultadu hosi inokulasaun ho vasina kontra COVID-19.

Notísia relevante: Kompensasaun kazu inkapasidade vasina hodi prevene situasaun exesionál

Maski risku efeitu sekundáriu grave hosi vasina kiik tebes, maibé Governu deside ho diploma ne’e hodi prevene situasaun exesionál, ne’ebé ninia efeitu sekundáriu grave liu hodi prevee kompensasaun loloos ba ema ne’ebé hetan efeitu sekundáriu hirak ne’e.

Dekretu-Lei ne’e define katak iha kazu inkapasidade kiik liu 30% tanba vasina kontra COVID-19 sei atribui kompensasaun ho valór $1.000, inkapasidade 30% to’o 70% sei atribui valór $2.100 no inkapasidade boot liu 70% sei atribui $7.000.

Enkuantu, iha kazu mate ne’ebé bele akontese tanba simu vasina sei atribui kompensasaun ida ho valór $10.000.

Governu haruka ona Projetu Dekretu-Lei ne’e ba Prezidente Repúblika iha loron 29 jullu no sei hein promulgasaun.

“Karik iha kazu komprovadu ruma, maski seidauk promulga Dekretu-Lei ne’e, ministériu relevante sira tuir orientasaun Konsellu Ministru no Primeiru-Ministru, Taur Matan Ruak, katak tenke halo intervensaun hodi providénsia apoiu ruma ba vítima sira,” nota ezekutivu subliña.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here