Koordenadór Gabinete Apoiu Sosiedade Sivíl, Filipe da Costa. Imajen TATOLI/Egas Cristóvão

DILI, 26 agostu 2021 (TATOLI)–Sekretariadu movimentu Scaling Up Nutrition (SUN) realiza diálogu daruak iha munisípiu Manufahi hodi diskute tópiku esensiál lima.  

“Diálogu ne’e iha tópiku lima esensiál relevante ho situasaun hodi diskute hanesan produsaun, transportasaun no armajenamentu, prosesamentu, distribuisaun no konsumu ai-han. Ha’u haree ai-han importante, enkuantu la’ós ema hotu asesu ba ai-han seguru no nutritivu,” Konvokadór Simeira sistema ai-han Nasaun Unida, Filipe da Costa, hateten, liuhosi nota imprensa ne’ebé Agência TATOLI asesu, iha kinta ne’e.

Partisipante diálogu sub-nasionál hamutuk ema 60, ne’ebé maihosi munisípiu Aileu, Ainaro, no Manufahi.

Nune’e, nia dehan, entre populasaun millaun 1,3 Timor-Leste, besik ema 400.000 mak enfrenta inseguransa ai-han grave no 47,1% mak sofre raes badak maski moris iha rai buras no bokur.

Diálogu sub-nasionál ne’e, hanesan parte ida hosi asaun iha dékada ida, ne’ebé Sekretáriu Jerál Organizasaun Nasaun Unida (ONU), António Guterres, lansa atu mobiliza país membru sira hodi diskute no partilla prátika di’ak atubele atinje lalais Objetivu Dezenvolvimentu Sustentável (ODS) iha tinan 2030.

“Timor-Leste nu’udar nasaun membru ONU, hakarak partisipa asaun sira hodi kontribui ativa hadi’a no hametin simeira sistema ai-han no sei prepara-an didi’ak hodi partisipa iha simeira globál iha fulan-setembru tinan ne’e iha Nova Iorke,” nia akresenta.

Governu no parseiru dezenvolvimentu sira halo ona esforsu lubuk ida hodi redús má nutrisaun no inseguransa ai-han, maibé dadus kontinua hatudu progresu atinjimentu kiik tebes.

Prevalénsia mundiál ba inseguransa ai-han hatudu 28%, iha Ázia 24%, Sudeste Aziátiku 19%, maibé Timor-Leste atinje 36%. 

Enkuantu, kazu raes badak ba labarik tinan lima mai kraik iha nível mundiál 22%, Ázia 22%, Sudeste Aziátiku 27%, no iha Timor-Leste 47,1% resin.

“Rezultadu ne’e hatudu katak ita-nia nasaun sei enfrenta problema barak hodi atinje Planu Estratéjiku Dezenvolvimentu Nasionál no ODS. Efeitu hosi má nutrisaun no inseguransa ai-han mak dezenvolve fíziku no kakutak labarik fraku no liga ba produtividade kiik, nune’e bele kauza ba instabilidade sosiál no ekonomia,” Konvokadór Simeira tenik.

Faktu hatudu liuhosi relatóriu Banku Mundiál tinan 2018, timor-oan 30% mak moris ki’ak rabat-rai ho rendimentu $1,90 kada loron no esperansa ba moris badak.

“Tanba ne’e, hadi’ak nutrisaun mak dalan seguru hodi opta ba sistema ai-han ne’ebé di’ak no ema hotu asesu ba ai-han seguru no nutritivu,” nia hatutan.

Atuál Koordenadór GASC konsidera timor-oan presiza konsolida hamutuk esforsu no rekursu liuhosi diálogu sira atu diskute dalan di’ak liu hodi rezolve problema sira ne’ebé liga ba asuntu inseguransa ai-han no nutrisaun inklui dezafiu no vantajen hodi hamosu rekomendasaun no solusaun di’ak ba sistema ai-han atu sai reziliente liután.

Administradór Manufahi, Arantes Isaac Sarmento, konsidera diálogu ne’e konsentra no tau idea hamutuk atu diskute dadus sira ne’ebé kada munisípiu iha kona-ba sistema ai-han hodi ekipa elabora sai rezultadu ida kona-ba sistema ai-han iha ita-nia munisípiu.

“Modelu dálogu sub-nasionál ne’e mak bele ajuda atu hadi’a sistema ai-han no fó esperansa ida katak rezultadu ne’e fó hanoin ba ita iha idak-idak nia munisípiu no lideransa nasionál sira hodi dezenvolve di’ak liután ita-nia sistema ai-han iha Timor-Leste,” Arantes Isaac, hateten, bainhira enserra diálogu sub-nasionál iha Manufahi.

Foin lalais, Governu liuhosi reuniaun Konsellu Ministru adopta pedidu atu Timor-Leste adere ba Simeira Sistema Ai-han (Food System Summit), nune’e, Primeiru-Ministru, Taur Matan Ruak nomea kedas Konvokadór Filipe da Costa no atuál Diretora Jerál Agrikultura-Ministériu Agrikultura no Peska, Maria Odete do Ceu Guterres, atu fasilita diálogu nasionál no sub-nasional kona-ba sistema ai-han iha Timor-Leste.

Nune’e, sira sei fasilita diálogu sira, molok partisipa simeira mundiál iha Asembleia Jerál ONU iha Nova Iorke.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here