Jestór Projetu Supporting Entrepreneurship and Employment for Women and Youth (SEEWAY), Francelino Gutteres, Imajen/Espesiál

DILI, 26 agostu 2021 (TATOLI)-Supporting Entrepreneurship and Employment for Women and Youth (SEEWAY) no youth Internship Programme ka (Programa estájiu foinsa’e) daudaun ne’e loke oportunidade ba programa  estájiu etapa II nian ba foin-sa’e resein graduadu (graduado resente) na’in-30.

Programa estájiu foin-sa’e (PEF) ne’e nu’udar programa pilotu ne’ebé́ dezeña hosi Programa Nasaun Unida ba Dezenvolvimentu (UNDP-sigla inglés) iha Timor-Leste liuhosi nia projetu  SEEWAY  nune’e fó oportunidade fulan tolu ba estudante  resein graduadu hodi hala’o  estájiu tuir sira-nia área nune’e bele hetan esperiénsia serbisu hodi haforsa liu tan sira-nia koñesimentu no abilidade hodi hetan serbisu.

“Ami haksolok tebes hodi anúnsiu oportunidade estájiu ba belun foin-sa’e estudante resein graduadu sira atu hetan esperiénsia profisionál iha instituisaun relevante tuir ita-boot sira-nia área estudu, tanba estajiáriu na’in-30 ne’e 50% feto,” Francelino Guterres hateten ba Agência Tatoli  iha Knua Juventude Pateo, Dili, kinta ne’e.

Nia dehan, estájiu ne’e oinsá foin-sa’e sira bele hetan esperiénsia serbisu reál iha organizasaun ida, atu hakbiit sira-nia koñesimentu no abilidade ba funsaun espesífiku ida liuhosi hetan akompañamentu no gia hosi mentor ka supervisor ida durante periodu estájiu, nune’e bele haforsa sira-nia abilidade (soft skills) hodi haluan koneksaun profisionál atu hafasil sira iha asesu traballu.

Nia afirma, programa sira ne’ebé prepara ba foin-sa’e sira ramata iha universidade mak iha área hanesan agrikultura, ekonomia no jestaun, turizmu, ospitalidade, komunikasaun, mekánika, enjeñaria sivíl no arkitetu, no petróleu.

Fatin ne’ebé SEEWAY nia parseiru 13  atu simu foin-sa’e sira atu hala’o estájiu mak iha munisípiu rua, Aileu no Dili, parseiru sira mak  hanesan Quinta Portugál Aileu, Fitun Foun Aileu, Plan International Aileu, AIBA Dili, Caltech Dili, Ev2tl Dili, Gota, Dili, Community Housing Dili, Bollore Dili, kompañia fornesedór Óleu Dili, JL Villa Dili, CRS Dili, BNCTL Dili no Aileu.

Programa Estájiu ba foin-sa’e sira ne’e fasilita hosi SEFOPE ho UNDP iha Timor-Leste no iha koordenasaun ho Ministériu Ensinu Superior Siénsia, no Kultura (MESCC) ho objetivu atu kanaliza no destaka estudante resente graduadu sira iha ONG, Kompañia, instituisaun Estadu no seluk tan, atu bele hasa’e sira-nia abilidade empregu no asesu ba merkadu traballu.

Nia afirma, ba estudante sira ne’ebé atu hetan oportunidade ba programa estájiu etapa II ne’e nia data submisaun aplikasaun ikus mak tuku 4:00 lorolaik, loron 30 agostu 2021.

“Ami-nia sei kontaktu ba kandidatu selesionadu sira atu tuir entrevista, nune’e, bele hala’o estájiu,” nia dehan.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here