DILI, 26 agostu 2021 (TATOLI)—Psychosocial Recovery and Development in East Timor (PRADET) fó formasaun kona–bá promove saúde mentál iha situasaun pandemia COVID-19 ba Konsellu Suku Becora.
Koordenadór Programa Asisténsia ba Moras Mentál, Nicolao Vicente Ximenes, hateten formasaun ne’e ho tema promove saúde mentál iha situasaun pandemia COVID–19 ba linhã frente hanesan konsellu suku, kompostu hosi delegadu no delegada, xefe suku, xefe aldeia no membru konsellu polísiamentu komunitária, tanbá sira-ne’e mak halo atendimentu ba komunidade sira loro–loron.
“Formasaun ne’e ho objetivu, atu hasa’e sira–nia konsiénsia no koñesimentu kona–bá promove saúde mentál no prevensaun COVID–19 no sira mós bele hatutan ba komunidade kona–bá oinsá mak bele prevene COVID–19 no mós ba sira–nia aan rasik, ho nune’e bele hametin sira–nia saúde mental. Karik sira iha koñesimentu kona–bá saúde mentál, sira mós bele proteje no refere ema ho problema mentál iha komunidade, atu bele hetan tratamentu,” Nicolao Vicente Ximenes hateten ba Agência Tatoli, iha Sede Suku Becora, Dili, kinta ne’e.
Matéria ne’ebé PRADET fó ba Konsellu Suco Becora liuhosi formasaun ne’e mak hanesan koñesimentu kona–bá saúde mentál, moras mentál, stress, maneja emosaun, tentativa oho an, prevensaun ba COVID–19 no mós vasinasaun.
Xefe Suku Becora, Antonio da Silva Soares, hateten formasaun ne’e hosi PRADET atu fó formasaun ba membru konsellu suku tomak, atu haree komunidade ne’ebé moras mentál iha suku laran.
“Ida ne’e prinsipál tebes atu sira bele iha kapasidade hodi haree ba ema-ne’ebé moras mentál nian. Tanba, ita haree ema-ne’ebé moras saúde mentál, dala barak ita dehan ema ne’e bulak maibé la’e, ema ne’e moras. Ho formasaun ne’e, hanesan oportunidade di’ak ba sira, atu sira iha koñesimentu kona–bá moras mentál ne’e rasik,” nia dehan.
Totál partisipante ba formasaun kona–bá promove saúde mentál iha situasaun pandemia COVID-19 ba konsellu suco Becora hamutuk na’in–25, ho durasaun loron rua, ne’ebé hahú ohin (kinta, 26/08) no sei termina iha aban (sesta, 27/08).
Jornalista : Nelia Fernandes
Editór : Cancio Ximenes
