Serimónia asinatura memorandu entendimentu ne’e asina hosi Prezidente Parlamentu Nasionál, Deputadu Aniceto Longuinhos Guterres Lopes no Ministra Saúde, Odete Belo. Imajen Tatoli/Evaristo Soares Martins.

DILI, 26 agostu 2021 (TATOLI)—Parlamentu Nasionál (PN) selebra ka asina memorandu entendimentu ho Ministériu Saúde (MS) ho objeitvu reforsa kooperasaun iha área saúde entre instituisaun rua ne’e.

Serimónia asinatura memorandu entendimentu ne’e asina hosi Prezidente Parlamentu Nasionál, Deputadu Aniceto Longuinhos Guterres Lopes no Ministra Saúde, Odete Belo, iha Sala Konferénsia Parlamentu Nasionál, kinta ne’e.

Prezidente Parlamentu Nasionál, Deputadu Aniceto Longuinhos Guterres Lopes, espera akordu ne’e bele la’o ho di’ak iha implementasaun, nune’e koordenasaun serbisu la’o ho fásil.

“Akordu ne’e nu’udar inísiu di’ak ida hodi garante saúde ba deputadu sira no funsionáriu sira parlamentu nian hodi hametin liután ita-nia sistema saúde. La’ós moras kiik ka boot ba hotu li’ur. Afinál iha rai-laran bele hela atende,” Aniceto Guterres ko’alia iha ámbitu asina akordu entre PN no MS, iha uma fukun.

Objetivu hosi selebra akordu ne’e atu reforsa kooperasaun entre Ministériu Saúde no Parlamentu Nasionál nune’e bele fó tratamentu saúde ba membru deputadu sira no funsionáriu sira iha ógaun soberania ne’e.

Nune’e mós akordu ne’e haforsa liután klínika Parlamentu Nasionál atubele fó tratamentu di’ak ba membru parlamentu sira no funsionáriu sira.

Durasaun hosi akordu ne’e sei hahú hosi 1 setembru 2021 to’o setembru 2023, sei iha psoibilidade bele iha alterasaun depende iha nesesidade.

Ministra Saúde, Odete Belo sente kontente tanba bele serbisu hamutuk ho órgaun soberania ne’e, nune’e hametin liután sistema saúde.

Nia dehan, maske Parlamentu Nasionál mantein ho postu tratamentu ida maibé ho akordu ida-ne’e bele haboot liután serbisu ne’ebé ministériu iha.

“Atualmente ita iha médiku no infermeiru ne’ebé mak iha. Ami mós indika médiku espesialista atubele tau-matan ba ita-nia señor Prezidente Parlamentu Nasionál nian maibé oinsá membru parlamentu sira seluk, sira hakarak check up ruma karik entaun postu tratamentu ida iha-ne’e, dalaruma la sufisiente entaun ho akordu ida-ne’e parlamentu mós bele haree mós rekursu ruma,” nia dehan.

Nia husu Parlamentu Nasionál bele haree mós rekursu uma ruma íha saúde nian atubele hatán ka apoia médiku sira hala’o serbisu ho di’ak.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here